Pakistan: Amerîka û Îran ji rêkeftina aştiyê nêzîk bûne

AP

Gewriya Hormizê

Wezîrê Berevaniyê yê Pakistanê eşkere kir ku Amerîka û Îran di warê gihiştina bi rêkeftineke aştiyê de nêzîkî hev in û tekez jî kir ku aşti ji bo navçeyê bi sûd e. Herwiha da xuyakirin ku vekirina korîdoreke nû li Tengava Hormizê pêşveçûneke berbiçav bi xwe re aniye.

Wezîrê Berevaniyê yê Pakistanê Xewace Mihemed Asif, di daxuyaniyekê de ji bo ajansa Bloombergê eşkere kir ku careke din rêkeftineke aştiyê di navbera Amerîka û Îranê de li holê ye û karên ji bo wê armancê jî tên kirin.

Wî her wiha got: Di du rojên borî de, hemû amaje di wê wateyê de bûn ku ev her du welat di warê gihiştina bi rêkeftineke aştiyê de nêzîkî hev in.

Ev daxuyanî piştî wê yekê tê ku Serokê Amerîkayê Donald Trump, ragihandibû: Pêwîste Îran qerebûya Amerîkayê bike, ev jî mercê sereke yê danûstandinên me ye." Ev daxuyaniya Trump wekû daxwaza Îranê ye ku ew jî daxwaza qerebûkirina ziyanên şer dike.
Trump di postekê de ku li ser platforma (Truth Social) belav kiriye, diyar kir: "Qerebûkirin dê hemû kuştî û birîndarên ku bi mûşekên Îranê hatine kuştin bigire xwe, her wiha pêwîste qerebûya kesûkarên ew kesên ku di nava 50 salên borî de di xwepêşandanan de hatine kuştin jî bê kirin."

Ji aliyekî din ve, ajansa Mehr ya Îranê belav kiriye ku îro Wezîrê Navxwe yê Pakistanê Muhsin Reza Neqwî, gihîşt Îranê daku bi berpirsên wî welatî re danûstandinên aştiyê bikin.

Di heman demê de, Wezîrê Derve yê Îranê Ebas Îraqçî, di pêwendiyeke telefonî de bi Wezîrê Derve yê Pakistanê Mihemed Ishaq Dar re, behsa danûstandinên Omanê kir ji bo vekirina korîdorekê li Tengava Hormizê bi armanca derbasbûna keştiyên petrol hilgiran.

Têkildarî heman mijarê, Berdevkê Wezareta Derve ya Qeterê Macîd Ensari, ragihand ku danûstandinên di navbera desthilatdarên Oman û Îranê de yên derbarê Tengava Hormizê de gihiştine asteke pêşketî.

PUKMEDIA