Reuters: Herikîna Petrola Iraqê bo Tirkiyeyê tevî bidawîhatina peymanê berdewam dike

Reuters

Boriya Petrola Kerkûk Ceyhan

Li gorî ku du jêderên Tirk ji ajansa Reuters, îro Pêncşemê ragihandine ku, herikîna petrola xav a Iraqê ber bi bendera Ceyhanê ya Tirkiyeyê ve bi riya xeta boriya Kerkûk - Ceyhanê bêyî navber berdewam dike, tevî ku peymana rêkxer a bikranîna boriya di navbera her du welatan de bi dawî hatiye û danûstandin ji bo dirêjkirina wê ji bo 12 mehên din berdewam in.

Roja Duşema borî 27/7/2026an, dema derbasdariya peymana dualî ku bikaranîna boriya Iraq-Tirkiyeyê di nava dehsalan de birêve dibir bi dawî hat, bêyî ku Bexda û Enqere peymana dirêjkirinê îmze bikin. Ev yek di serdana Serokwezîrê Iraqê Elî Zeydî bo Tirkiyeyê û civîna wî ya bi Serokkomar Recep Tayyip Erdogan re di roja Sêşemê de pêk hat.

Yek ji jêderan da zanîn ku boriya navborî ku tenê dergeha hinardekirinê ya xebatkar a Bexdayê ye, dê bi hewldanên berdewam ên di navbera her du welatan de bixebite da ku bigihêjin peymaneke demkî ku herikîna neftê di dema danûstandinên li ser çarçoveyeke nû de misoger bike.

Wezareta Wize ya Tirkiyeyê û Wezareta Petrolê ya Iraqê ti daxuyaniyeke fermî derbarê rewşa boriya piştî bidawîhatina peymana berê de nedan.

Pêştir Wezîrê Wize yê Tirkiyeyê Alparslan Bayraktar, di destpêka vê mehê de ragihandibû ku her du welat gihiştine têgihiştineke ji bo dirêjkirina peymanê ji bo salekê, û tekez kiribû ku danûstandin kete qonaxa xwe ya dawî.

Lê belê, serdana Serokwezîrê Iraqê bo Enqerê bû sedema îmzekirina dirêjkirinê, di heman demê de Erdogan tekez kir ku her du welat armanc dikin ku di zûtirîn dem de peymaneke berfireh a hevkariyê di warê wizeyê de îmze bikin.

Tê çaverêkirin ku dirêjkirina demkî bide Bexda û Enqerê ku zêdetir demê bidin ji bo danûstandinên li ser peymaneke berfirehtir, ku ne tenê bi berdewamkirina xebata boriya sînorkirî be, belkî zêdekirina sûdwergirtina ji kapasîteya wê û girêdana wê bi herêmên nû yên hilberînê re jî bigire nav xwe.

Tirkiye dixwaze rêjeyên bikaranînê yên boriya petrolê bilind bike, ku kapasîteya wê nêzî 1.5 milyon bermîlî ye di rojekê de, û dibe ku wê heta zeviyên neftê yên li başûrê Iraqê jî dirêj bike.

Daneyên Tirkiyê nîşan didin ku boriya niha tenê nêzî 170 hezar bermîlî di rojekê de vediguhêze, ku dike nêzî 11 ji sedî ji kapasîteya xwe ya herî zêde.

Boriya navborî dergeheke sereke ye ji bo hinardekirina petrola zeviyên bakurê Iraqê bo bazarên cîhanî, bi riya bendergeha Ceyhanê ya li ser Deryaya Spî, di heman demê de pêşvebirina wê rêgeheke din dide Bexdayê ku xavê dûrî bendergehên başûr hinarde bike.

PUKMEDIA