Bi zextê nirxê benzînê li Silêmaniyê tê giran kirin

PUKMEDIA

benzîn

Bihayê benzînê li parêzgeha Silêmaniyê jî wekî parêzgehên Hewlêr û Duhokê bilind bû, û pisporê warê enerjiyê jî dibêje ku zext li ser benzînxaneyên Silêmaniyê hatiye kirin da ku wekî wê her du parêzgehên din bihayê benzînê gran bikin.

Behjet Ehmed, pisporê warê enerjiyê û peymanên petrol û gazê, ji PUKMEDIAyê re ragihand: Zext li ser benzînxaneyên sînorê parêzgeha Silêmaniyê hatiye kirin da ku wekî parêzgehên din ên Herêmê bihayê benzînê bê gran kirin. Ev jî di demekê de ye ku berê ji bo sê rojan hatina benzîna bazirganî ya Lanaz û Kar bo Silêmaniyê hatibû rawestandin.
Serê sibê ya îro bihayê benzînê li parêzgeha Silêmaniyê hate giran kirin, lîtreyek benzîna sûper bû 1.700 dînar, lîtreyek benzîna muhesen jî 1.550 dînar, di heman demê de lîtreyek benzîna normal jî bû 1.200 dînar, di demekê de ku berê bihayê her yek ji van corên benzînê 100 dînêr erzantir bû.
Derbarê vê yekê de jî, Behjet Ehmed got: Çend roj in rêgirtin li ser şandina benzînê bo Silêmaniyê tê kirin, ev yek bûye sedem ku bihayê her lîtreyek benzînê 100 dînar bilind bibe û pêwîste rêveberiya Silêmaniyê hewldanên xwe bide da ku rê li ber bilindbûna zêdetir a bihayê benzînê li Silêmaniyê bê girtin.

Ji ber rawestandina karê Dana Gasê, ev nêzîkî mehekê ye ku bihayê sotemeniyê li Herêma Kurdistanê giran bûye û li parêzgehên Hewlêr û Duhokê qeyrana benzîn, gaz û sotemeniyên din derketiye holê, û welatiyên bajarê Hewlêrê ji bo benzînê diçin bajarokên Koye û Ranya. Herçend e bi awayekî kêmtir bihayê benzînê li parêzgeha Silêmaniyê bilind bibû, û di heman demê de ji ber wî planê ku ji aliyê rêveberiya bajêr ve hatibû danîn, qeyrana sotemeniyê wekî parêzgehên Hewlêr û Duhokê çênebû, lêbelê di vê demê de hewldanek heye ji bo ku qeyran berê xwe bide parêzgeha Silêmaniyê jî û bihayê sotemeniyan wekî Hewlêr û Duhokê lê bê kirin.

PUKMEDIA