Termê kalemêrekî kurd li Efrînê kuştî hate dîtin

Ajans

Darên Zeytûnê li Efrînê

Li gundewarên herêma Efrînê termê kalemêrekî Kurd di nav darên zeytûnan de kuştî hat dîtin, ku di bin şert û mercên nepen de du gule li serê wî ketibûn.

Li gorî Rêxistina Mafên Mirovan a Efrîn- Sûriyê, roja Înê 10/7/2026 danê êvarê, cenazeyê kalemêrekî kurd di nav zeviyên darên zeytûnan de hat dîtin, ku du gule li serê wî ketibûn.

Li gorî çavkaniyên herêmî, qurbanî bi navê Mihemed Murad Mihemed, 60 saliye û ji gundê Xelnêrê ya gundewarê Efrîn bûye.

Bi gotinê malbatê, kalemêrê kurd danê sibehê bi otomobîla xwe ji mala xwe derket û çû nava zeviyên zeytûnên xwe da ku darên xwe av bide. Dema ku ew heta piştî nîvro venegeriya malê. Piştî lêgerînan termê kalemêrê kurd di nava darên zeytûnan de hat dîtin, ku du gule li serê wî ketibû. Otomobîla wî di nav darên zeytûnan de parkirî bû.

Aliyên pêwendîdar piştî lêkolînên yasayî, cenaze radestî malbatê kirin bê ku tawanbar yan sedema kuştinê werin zanîn.

Ji aliyekî din ve jî li navçeya Mabata ya li gundewarê Efrîn, du ciwanên Kurd ji aliyê kesên nenas ve rastî êrîşê hatin piştî ku pez û pere û telefonên wan ên desta ji wan hatibûn dizîn.

PUKMEDIA