Sûriyê mûçeyan dide malbatên şehîd û kêmendamên HSDê

Nêrîna Azad

Alên HSD û Hikûmeta Sûriyê

Di demekê de ku pêvajoya entegrekirina di navbera Hêzên Sûriye Demokratîk (HSD) û hikûmeta Şamê de berdewame,berpirsekî paye bilind yê Hêzên Sûriye Demokratîk (HSD) ragihand ku Wezareta Parastinê ya Sûriyê dê mûçe û xizmetên cûr be cûr yên civakî bide malbatên şehîd û kêmendaman yên HSDê.

Her weha wî berpirsê paye bilind yê (HSD) diyar kir ku nêzîkî 8 hezar şervan hîna ne hatine entegrekirin di nava ti saziyeke leşkerî yan ewlehiyê, û danûstandin li ser vê mijarê hîna jî berdewam in.

Wî berpirsî aşkere kir ku di çarçoveya damezrandina Firqeya 60.emîn ya Artêşa Sûriyê de, sê lîwayên HSDê li baregehên li ser lihevkirinekê li Hesekê, Qamîşlo û Dêrikê hatine bicihkirin û got:Endamên lîwayê dê hêdî hêdî li akademiyeke leşkerî li gundewarê Şamê perwerdeyê bibînin,di heman demê de ku fermandarên lîwa û yekîneyan dê li Kolêja Şer ya li parêzgeha Humsê perwerdeyê bibînin.

Derbarê hejmara şervanan, jî diyar kir ku piştî bûyerên dawî, hejmara mayî yên şervanên HSDê 20 hezar in, û dabeşkirina wan bi vî awayî aşkere kir:

*Çar hezar şervan:Tevlî Hêzên Ewlekariya Hundirîn (Asayîş) û dezgehên bicîhanîna qanûnê bûn.

* Pênc hezar şervan:Tevlî sê lîwayên nû hatine damezrandin bûn.

*Nêzîkî hezar ciwanên Efrînî digel malbatên xwe vegeriyane bajarê xwe.

*Du hezar ciwanên ji Efrîne li bendê ne ku bi awayekî hevrêz vegerin û li wir bibin beşek ji yekîneyeke leşkerî.

Heman çavkaniyê aşkere kiriye ku,hîna 8 hezar şervanên HSDê hene ku hîna ne hatine entegrekirin di nava ti saziyeke leşkerî yan ewlehiyê de, lewma hîna gotûbêj û danûstandin berdewam in ji bo dîtina çareseriyek ji bo wan û ji nû ve bicîhkirina wan.

PUKMEDIA