Parêzgarê Hesekê û Hikûmeta Şamê vegera koçberan gotûbêj dikin

ANHA

Parêzgarê Hesekê û Şanda Şamê

Parêzgarê Hesekê Nûredîn Ehmed bi şandeya serokatiya hikumeta demkî ya Şamê re civiya û vegera ewle ya koçberên Efrînê, Şehba û Serêkaniyê gotûbêj kirin, her weha biryare  nêzîkî 1600 malbatên koçber ên Efrînê vegerin gundên xwe. 

Di çarçoveya şopandina bicihanîna bendên Peymana 29ˊê Çileyê de, Parêzgarê Hesekê endazyar Nûredîn Ehmed şandeya serokatiya hikumeta demkî ya Sûriyeyê ya têkildarî şopandina bicihanîna peymanê pêşwazî kir.

Di civîna ku Cîgirê Rêveberê Ewlekariya Hundirîn a parêzgehê Mehmûd Xelîl û endamê şandeya serokatiyê, Dr. Mistafa Ebdî jî beşdar bûn de, rewşa vegera malbatên koçber hate nirxandin. Her wiha mekanîzmayên hevrêziya di navbera aliyên peywendîdar de ji bo derbaskirina astengiyên ku dibe ku li pêşiya vê pêvajoyê derkevin hatin gotûbêjkirin, da ku aramiya vegeriyan were misogerkirin û pêdiviyên wan ên bingehîn bên peydakirin.

Di heman demê de, di civînê de li ser amadekariyên pêwîst ji bo bicihanîna vegera koçerên Efrîn, herêmên Şehba û Serêkaniyê di demeke pêş de hat gotûbêj kirin.

Hatiye destnîşankirin ku niha amadekarî ji bo vegera nêzîkî 1600 malbatên koçber ên Efrînê bo malên xwe di vê hefteyê de tê kirin, li gorî agahiyan, koma 8ˊan a koçberên Efrînê dê roja Çarşemê 10 Hezîran 2026 ber bi Efrînê ve bikeve rê.

PUKMEDIA