Kongra 7.ya Yekitiya Nivîskarên Kurd li Qamişlo bi rêve diçe

ANHA

Dîmenek ji kongreyê

Yekitiya Nivîskarên Kurd li Sûriyeyê bi dirûşma "Nivîskarî berpirsyarî ye" kongreya xwe ya 7.emîn li bajarê Qamişloyê li  dar dixe,kongre bi beşdariya nivîskar, rewşenbîr, helbestvan, hunermend, şêwekar û rexengiran li Parka Xwendinê ya bajarê Qamişlo  bi deqeyek rêzgirtin dest pê kir.

Endamê Desteya Rêveber ya Yekitiya Nivîskarên Kurd li Sûriyeyê Qadir Egîd di gotarekê de kongre li hemû rewşenbîran pîroz kir û got:Kongre di qonaxeke çarenûsî de ku Sûriyê û herêm tê re derbas dibin, tê lidarxistin,ev qonax û guhertinên ku çêdibin berpirsyariyên giran datîne ser mile hemû rewşenbîr û nivîskaran û îro kom bûne daku careke din peyama xwe bi peyvên durist, ramanên ronak û afrîneriya ku sînoran nas nake, ragihînin û bêjin, hebûna me ya li vir ne civînek ji rêzê ye, lê belê baweriya me ya kur bi vê yekê piştrast dike ku wêje û çand rih û henaseya neteweyan e.

Qadir Egîd got:Ev vê kongreyê bikin pêngaveke sereke û careke din ji cîhanê re îsbat bikni ku em gel bi gotinan tiştên ku ji ber şer wêran bûne, dîsa ava bikin.

Piştî axaftinan peyamên pîrozbahiya kongreyê hatin xwendin,piştre endamên rêvebirina kongreyê hatin hilbijartin.

Kongre ji ragihandinê re girtî dewam dike,tê de rêzikaname tê xwendin û gotûbêjkirin,her wiha dê raporta du salan ya yekitiyê were xwendin û rewşa wê ya rêxistinî were nîqaşkirin.

Di kongreyê de dê serok û cigar û 9 endamên nû yên Desteya Rêveber ya Yekitiya Nivîskarên Kurd li Sûriyê werin hilbijartin û bi encamnameyekê bi dawî bibe.

PUKMEDIA