Doza Şêrwan Şêrwanî dê ji Serokwezîrê Kanadayê re bê şandin

PUKMEDIA

Şêrwan Şêrwanî

Li Kanadayê bi beşdariya hunermend, nivîskar û çîn û tiwêjên din, kampînek ji bo azadkirina Şêrwan Şêrwanî tê birêvebirin û dozê wî digihînin serokwezîrê wî welatî, her wiha rêkxirên kampînê jî daxwazê ji parêzvanên azadiyê dikin ku beşdar bibin û piştgiriyê li azadiya raderbirînê  bikin.

Li Kanada kampîna Azadiyê ji bo Şêrwan Şêrwanî, bi beşdariya hejmareke berçav ji hunermend, nivîskar, rojnamevan, çalakvan û karkerên Başûr û parçeyên din ên Kurdistanê tê birêvebirin. Kampîn ji komkirina îmzeyan û axaftina li ser rewşa azadiya rojnamegeriyê û azadiya ramanê li Herêma Kurdistanê û girtina Şêrwan Şêrwanî pêk tê.
Her wiha ew nameya derbarê azadkirina Şêrwan Şêrwanî û azadiya raderbirînê de ku bi zimanê îngilîzî hatiye amadekirin, bi rêya Îmêl ji serokwezîr, wezîrê derve yê Kanada, serokên partiyan, parlamenteran û rêxistinên siyasî û sivîl ên wî welatî re hatiye şandin. Di nameyan de daxwaz ji aliyan hatiye kirin ku fişarê bixin ser hikûmeta Herêma Kurdistanê daku Şêrwan Şêrwanî bê şert û merc azad bike û bêtir haydarî rewşa azadiya rojnamegeriyê û raderbirînê bin, ji ber ku Kanada yek ji wan welatan e ku giringiyê dide mafên mirovan.

Beşeke din a çalakiyan ji bo berevaniyê ye di ber Şêrwan Şêrwanî de ku li ser hin tohmetên nerast hatiye girtin. Çalakî ji komkirina piştgiriyê bi şêwazê onlayn pêk tên û beşek ji organîzatorên kampînê jî daxuyanî û ronkirinan didin medyayên Kanadayê.
Şêrwan Şêrwanî di 7ê Cotmeha sala 2020an de tevî hejmarek rojnamevan û çalakvanên Badînanê hat desteserkirin. Piştî çend mehan ji girtina wan, Dadgeha Taybet a Sûcan a Hewlêrê di roja 16ê Sibata 2021an de bi tohmeta "têkdana ewlehiya nîştimanî", cezayê şeş salên zîndanê li ser ferz kir. Paşê di dîroka 19ê Tebaxa 2025an de di dadgeha cezayên sivik a Bineslawe de, bi zêdetirî çar salên din ên zîndanê hate cezakirin.


PUKMEDIA