Serok Bafil û Mamosta Selahedîn: Rewşa asêbûyî ya Herêmê xizmeta berjewendiyan nake

Ragihandina Serokê YNKê

Serok Bafil û mamosta Selahedîn Mihemed Behadîn

Serokê Yekîtiya Nîştimanî ya Kurdistanê `Bafil Celal Talebanî` li Debaşan pêşwazî li Emîndarê Giştî yê Yekgirtuya Îslamî ya Kurdistanê rêzdar mamosta `Selahedîn Mihemed Behadîn` kir.

Di civînê de ku berpirsê borda pêwendiyên Kurdistanî yê YNKê rêzdar `Salar Lale Serhed` amade bû, pêşveçûnên siyasî yên Herêma Kurdistanê û Îraqê hat gotûbêj kirin û giringiya berdewamiya diyalog û lihevkirina di navbera hêz û aliyan de ji bo derbaskirina alingariyan bi giring hat zanîn. Ji bo wê armancê jî mamosta `Selahedîn Mihemed Behadîn` destpêşxeriyek ji bo derbazbûna xitimandina siyasî ya li Kurdistanê pêşkêşî Serokê Yekîtiya Nîştimanî ya Kurdistanê kir.

Her weha herdu alî hevrabûn ku rewşa xitimandina siyasî ya Herêma Kurdistanê xizmeta berjewendiyên giştî nake û ji bo nehêştina astengiyan pêwîste gavên cidî bên avêtinê, ew jî bi nêrîneke nîştimanî û berpirsyarane dibe ku armanc xizmetkirina welatiyan be.

Serokê Yekîtiya Nîştimanî ya Kurdistanê ragihand: Em weku YNKê di dema bihurî de, her weha dema niha û di pêşerojê de jî emê pêşwaziya her destpêşxeriyekê bikin ku bi dilsozî û bi sûd û di berjewendiya gelê Kurdistanê de bê.

Ji aliyê xwe ve Emîndarê Giştiyê Yekgirtuya Îslamî, destpêşxeriya xwe pêşkêşî `Bafil Celal Talebanî` kir, Serokê YNKê jî biryar da ku ji îro pêve û ji bo avakirina zemînekê ji bo aramkirina rewşê, medyayên Yekîtiya Nîştimanî ya Kurdistanê ji bo vê rewşê alîkar bin û nebin parçeyek ji tundkirina nakokiyan.

Her di civînê de tekezî li ser hemahengî û bihêzkirina pêwendiyên YNKê û Yekgirtuya Îslamî di çarçoveya zêdetir xizmetkirina welatiyan de hatiye kirin.

PUKMEDIA