Vekişîna Hevpeymaniya Navdewletî ji baregeha Şedadê û nûçeyên derbarê teqandina wê heye

PUKMEDIA

Alavên Amerîkî

Rewangeha Sûrî ya Mafên Mirovan (SOHR) ragihand ku karwanekî Hevpeymaniya Navdewletî ji baregeha xwe ya li bajarokê Şedadê yê li başûrê Hesekê ber bi sînorê Îraqê ve derketiye, li wir bingeh hatiye valakirin û girtin. Rewangehê da zanîn ku ji sibê ve, roja Pêncşemê 5/2/2026an, dengê teqînên bi hêz li gundewarê başûrê Hesekê hatiye bihîstin. Di heman demê de SOHRê ji zarê hinek jêderan veguhast ku hêzên Hevpeymaniya Navdewletî beriya ku ji cihê xwe derkevin, bingeha xwe ya li bajarokê Şedadê teqandine, ev yek jî hevdemî firîna balafirên şer li esmanê herêmê bû.

Di 2yê vê mehê de (Şibatê), hêzên Hevpeymaniya Navdewletî dest bi gavên pratîkî yên vekişîneke hêdî-hêdî ji bingehên xwe yên li ser axa Sûriyê kirin, ev pêşketineke balkêş e ku guhertinên lezgin ên meydanî û siyasî li herêmê nîşan dide.
Rewangehê eşkere kir ku hêzên Hevpeymaniyê, di demjimêr û rojên borî de, dest bi valakirina kelûpelên serbazî û lojîstîk ji hejmarek bingehên xwe yên serekî kirine, ku bingeha "Tenef" a li sêgoşeya sînorê Sûriye-Îraq-Urdunê di serî de ye. Li wir ala û amûrên serbazî hatin kişandin û beşek ji endaman ber bi axa Urdunê ve hatin veguhastin, tevî tedbîrên ewlehiyê yên tund.

Di heman çarçoveyê de, karwanekî serbazî yê mezin ê hêzên Hevpeymaniyê ji bingeha "Xerab El-Cîr" a li devera Rimêlan a gundewarê Hesekê derket û di ser dergeha sînorî ya El-Welîd re ber bi Îraqê ve çû. Karwan ji bi dehan barhilgirên tije amûrên serbazî, wesayîtên zirhî û tankên sotemeniyê pêk dihat, ku wesayîtên zirxî yên serbazî û helîkopterên Hevpeymaniyê ji bo parastina xeta vekişînê bi wan re bûn.
Rewangehê derketina nêzîkî 100 barhilgirên ser bi hêzên Hevpeymaniyê ku berê ketibûn bingeha Xerab El-Cîr, ber bi Herêma Kurdistanê ve şopandibû û paşê dîsa vegeriyan, ev nîşaneke zelale li ser lezbûna hilweşandina binesaziya lojîstîk a bingehên leşkerî.

Li gorî jêderan, şêwazê van tevgeran nîşan dide ku vekişîn ne tenê bi şiklekî formal an sînordar e, lê di çarçoveya planeke birêkûpêk de ye ji bo ji nû ve belavkirina hêzan û kêmkirina hebûna leşkerî di hundurê Sûriyeyê de, wek amadekariyek ji bo egerên berferehtir di qonaxa bê de.

PUKMEDIA