Mezlûm Ebdî: Em ji bo rawestandina xwînrijandinê vekişiyan, û serkeftin wê ya me be

PUKMEDIA

Mezlûm Ebdî fermandarê HSD

Fermandarê Giştî ya Hêzên Sûriya Demokratîk (HSD) ragihand ku şer li ser wan hat ferzkirin, û destnîşan kir ku wan biryara vekişîna ji Dêrezor û Reqayê daye da ku qada şer fireh nebe û xwîn zêdetir neyê rijandin.

Fermandarê HSD’ê Mazlûm Ebdî, di daxuyaniyeke televîzyonî de derengiya şeva borî Yekşemê (18/1/2026) got: Ev şer li ser me hat ferzkirin her çend me xwestibû êrîşan bidin sekinandin. Bal kişand ser wê yekê ku di vê şerî de hejmarek şervanên hêzên leşkerî û ewlehiyê şehîd bûn û xelkê sivîl jî hatin koçberkirin.
Mazlûm Ebdî diyar kir ku beriya ku îro Duşemê biçe Şamê, wî xwestiye hin xalên girîng eşkere bike. Wî got ku ew ê li ser berxwedan û têkoşîna xwe berdewam bin, hêz û baweriya wan bi serkeftinê heye, û dê her tiştî ji bo serkeftinê bikin.

Ebdî tekez kir ku wan çi ji destê wan derdiket kirin ku ev şer çênebe, lê belê hin aliyan berê biryara vî şerî dabûn.
Got jî: Destkeftiyên gelê me dê bên parastin. Wî anî ziman ku ji bo rawestandina rijandina xwînê, wan biryar da ku ji Reqa û Dêrezorê vekişin û li Hesekê ji nû ve bi cih bibin.
Her wiha Ebdî eşkere kir ku piştî ji Şamê vegerin, ew ê naveroka peymanê bi berfirehî ji raya giştî re ragihînin.
Ji aliyê din ve, ajansa nûçeyan a fermî ya Sûriyê (SANA) êvara duh ragihand ku di navbera Hikûmeta Sûriyê û Hêzên Sûriya Demokratîk de peymanek ji bo agirbestê û tevlîbûna tam a HSD'ê di nav artêşê de hatiye îmzekirin.

PUKMEDIA