Mezlûm Ebdî: Hikûmeta Dîmeşqê Sîstema Ne Navendî pesend dike

Xeber 24

Mezlûm Ebdî Fermandarê Giştî yê Hêzên Sûriye Demokratîk

Fermandarê Giştî yê Hêzên Sûriye Demokratîk, Mezlûm Ebdî, peymanek bi desthilata veguhêz ya Sûriyê re eşkere kir ku têde tevlîbûna hêzên wan di nava Artêşa Sûriyê de û pesendkirina prensîba ne navendîbûnê di rêveberiyê de diyar dike, ku guhertinek girîng di pêvajoya siyasî ya Sûriyê de nîşan dide.

Ebdî di hevpeyvînek televîzyonê de aşkere kir ku peymana ku di civînên li Dîmeşeqê de hatine bidestxistin, li ser sê teweran sereke hatiye avakirin:

- Tevlîbûma leşkerî: Hêzên Sûriye ya Demokratîk û Hêzên Ewlekariya Navxwe dê tevlî Wezareta Parastinê ya Sûriyê bibin, di heman demê de pêgeha xwe û ezmûna xwe ya şer jî biparêzin.

- Pesendkirina Sîstema Ne navendîbûnê: Pesendkirina sîstemeke ne navendî ya hikûmetê, bi destpêkirina nirxandina destûra bingehîn ya Sûriyeyê da ku ev prensîb tê de cih bigire.

- Agirbesteke berfireh: Cî bi cî kirina agirbestekê li hemû eniyan li gorî Peymana 10ê Adarê.

Her weha Ebdî atmosfera li Şamê wekî "erênî" bi nav kir, û tekez kir ku aliyê Sûrî vekirîbûnek bê hempa li hemberî daxwazên Rêveberiya Xweser nîşan daye û got:Şandeke Leşkerî dê di demek nêzîk de ji bo hûrgiliyên yekbûnê biçe Dîmeşqê, di heman demê de şandeyeke sivîl jî dê serdana bajarên Sûriyê bike daku modêla Ne navendîbûnê rave bike.

Ebdî, ji bo bi sed hezaran kesên koçber mizgîniyek baş da û got: Dema vegera rêxistinkirî hatiye ya xelkê Efrîn, Girê Spî û Serê Kaniyê û bang li xelkê Efrîn kir ku xwe ji bo vegerê amade bikin.

Fermandarê Giştî yê Hêzên Sûriye Demokratîk, Mezlûm Ebdî, aşkere jî kir ku, Hevpeymaniya Navdewletî ji Hikûmeta Dîmeşqê  xwestiye ku bi fermî tevlî Hevpeymaniya Navdewletî li dijî DAIŞê bibe daku şerê li dijî terorê niştimanî û berfirehtir bibe.

PUKMEDIA