Herêma Kurdistanê petrol da Bexdayê û meaş wergirtin

Kurdistan 02:40 PM - 2025-07-22

Diravên Iraqî

Wezareta Darayiyê ya Îraqê ragihand, wan dest pê kiriye ku mûçeyên meha gulanê yên karmendên Herêma Kurdistanê bişînin.

Wezaretê da zanîn, ev biryar piştî wê yekê hatiye dayîn ku hikûmeta Kurdistanê dest pê kiriye ku berhema xwe ya petrolê radestî desthilatdarên Îraqê kiriye.

Wezareta Darayiyê ya Îraqê di daxuyaniyekê de got, piştî ku Hewlêr pêbendî peymana dawî ya li gel Bexdayê maye wan dest bi dayîna mûçeyên karmendên Hikûmeta Herêma Kurdistanê kiriye.

Li gorî daxuyaniya Wezaretê, Hikûmeta Herêma Kurdistanê dest pê kiriye ku berhema xwe ya niha ya petrolê radestî Saziya Firotina Petrolê ya Dewletê ya Îraqê (SOMO) bike û dê vê yekê bidomîne heta ku rojane bigihe 230 hezar bermîlî.

Herêma Kurdistanê 120 milyar dînar dane Bexdayê

Wezaretê her wiha piştrast kir ku wan ji dahatên ne-petrolî yên Herêma Kurdistanê 120 milyar dînar wergirtine û ev jî berê ji aliyê Hikûmeta Herêma Kurdistanê ve hatibû ragihandin.

Peymana Hewlêr û Bexdayê

Hikûmeta Herêma Kurdistanê û Hikûmeta Îraqê pêncşema borî rêkeftineke ku armanca wê çareserkirina nakokiyên wan ên darayî û hinartina petrola Kurdistanê bû gihand encamê.

Lê belê rayedarên her du aliyan hîn jî hevdû bi afirandina astengiyan tohmetbar dikin.

Li gorî rêkeftinê, divê Herêma Kurdistanê hemû berhema xwe ya petrolê bi rêya SOMOyê hinarde bike û rojane 50 hezar bermîlan ji bo bikaranîna navxweyî wergire.

Li beramberî vê jî tê payîn ku Bexda parên budceyê bişîne û eger pêwîst be ji Herêma Kurdistanê re sotemeniya paqijkirî dabîn bike.

Her wiha Herêma Kurdistanê pêbend e ku ji bo meha gulanê 120 milyar dînarên Îraqî (nêzîkî 92 milyon dolaran) ji dahatên ne-petrolî radestî Bexdayê bike.

PUKMEDIA