Talebanî: Bikaranîna artêşê li dijî Kurdan pêngaveke metirsîdar e

PUKMEDIA

Qubad Talebanî

Cîgirê Serokwezîrê Herêma Kurdistanê Qubad Talebanî ragihand:  "Artêş li dijî xwediyên eslî yên axê bi binpêkirina destûr û qanûnan tê bikaranîn. Ev reftar pêngaveke metirsîdar e û pêşeroja jiyana hevbeş dixe metirsiyê. “Em bi hemû awayî piştgiriya cotkaran dikin û dê hewl bidin bi hevkariya hemû aliyên Kerkûkê vê pirsgirêkê çareser bikin.’’

Cîgirê serokwezîr Qubad Talebanî got:“Kêmtirî mehek bi ser derxistina yasaya betalkirina biryarên Encumena Serkirdatiya Baasê ya hilweşiyayî re derbas bûye, lê artêş li dijî xwediyên eslî yên axê bi binpêkirina destûr û yasayê tê bikaranîn.’’

Ew lê zêde dike:“Me her tim ji bo bihêzkirina ruhê bihevre jiyanê li Kerkûkê kar û xebat kiriye, bikaranîna artêşê û reftareke wiha pêngaveke metirsîdare û berdewamiya binpêkirinên bi vî rengî dê pêşeroja bihevre jiyanê dixe metirsiyê.’’

Qubad Talebanî got jî:“Em bi hemû awayî piştgiriya  cotkaran dikin û bi hevkariya hemû aliyên Kerkûkê dê hewl bidin vê pirsê çareser bikin û tekezî li ser sizakirina qanûnî ya binpêker û kesên ku fermana bikaranîna artêşê li dijî cotkarên Kurd dane, bikin.’’

PUKMEDIA