Serok Reşîd 22mîn Salvegera Şehadeta Ayetullah El-Hekîm bibîr anî

Malpera serokatiyê

Serok Ebdulletîf Cemal Reşîd

Serok Ebdulletîf Cemal Reşîd îro beşdarî merasîma bibîranînê ya li salona mezin a Bexdayê bû, ku bi serperiştiya ofîsa taybet ya Rêzdar Seyîd El-Hekîm hat lidarxistin. Di çalakiyê de 22’yemîn salvegera şehadeta ayetulah Seyîd Mihemed Baqir El Hekîm hat bibîranîn û roja şehîdên Iraqê hat rêzgirtin.

Serok Reşîd di axaftina xwe de salvegera şehadeta Ayetullah Seyîd Mihemed Baqir El Hekîm wek bîranîneke bi êş ji bo me hemûyan bi nav kir. Di berdewamiya axaftina xwe de wiha got: “Me şervan û têkoşerekî jiyana xwe ji bo azadiya Iraqê û avakirina dewleteke dadperwer-dewleta azadî û demokrasiyê ji dest da.”

Serokomar bal kişand ser rola girîng a Ayetullah Hekîm di yekxistina opozîsyona Iraqê di salên dîktatoriyê de.

Her wiha bal kişand ser dilsoziya ayetulah Hekîm a ji bo yekîtiya neteweyî û got: Rola wî di yekrêziya pêkhate, mezheb û nasnameyên cihê yên Iraqê de di avakirina dewleteke demokratîk de girîng bû.’’
Serok Reşîd balkişand li ser kêşeyên navçeyî û tekezî li ser pabendbûna Iraqê bi pêşxistina diyalog û hevkariyê kir.

"Em rijd in ji bo şerê li dijî terorê û yekkirina hewlan ji bo bidestxistina ewlehî, aştî û pêşketinê," wî got. "Bi rêya diyalog û hevtêgihiştinê em armanc dikin ku aramiya herêmê vegerînin û daxwazên gelên wê yên ji bo jiyanek azad û bi rûmet pêk bînin."

Serokomar her wiha tekezî li ser xema  Iraqê ji bo pêkvejiyana aştiyane û nehiştina êrişan kir û got: Em pêbend in bi wê yekê ku xaka Iraqê ti carî wek platformek ji bo êrîşkirina li dijî ti cîranan neyê bikaranîn.’’
Di dawiyê de Serok balkişand li ser giringiya yekrêziya niştimanî û hewlên hevbeş ji bo bihêzkirina serxwebûn, ewlehî û pêşketina Iraqê.

PUKMEDIA