Zêdetirî 763 hezar welatiyên Iraqê reviyane Ewropayê

Ajans

Koçberan

Ajansa Lutka ya Karûbarên Penaberan ragihand, di 10 salên borî de zêdetirî 763 hezar kes ji Herêma Kurdistanê û Iraqê koçberî Ewropayê bûne û 593 koçber jî jiyana xwe ji dest dane.

Lutka rêxistineke ne hikûmî ye ku xizmetguzariyan pêşkêşî penaberên li hundir û derveyî Iraqê dike.Li gor amarên ku ajansa Lutka di 18/12/2024 bi helkefta roja cîhanî ya penaberan belav kiriye: “Ji sala 2015’an heta niha hejmara penaberên Herêma Kurdistanê û Iraqê gihiştiye 763 hezar û 398 welatiyên ku daxwaza mafê penaberiyê li welatên Ewropayê kirine û di wan penaberan de 345 koçber dema hewl didan derbas bibin jiyana xwe ji dest dane û 248 koçber jî winda bûne.’’

Li gor amarên wê ajansê, sala 2015an herî zêde hejmara koçberan hatiye dîtin û giheştiye 186 hezar û 422 kesan, ku ev hejmara herî zêde di 10 salên borî de hatiye tomarkirin.

Diyardeya koçberiya ji Herêma Kurdistanê û Iraqê ber bi welatên Ewropayê ve ne nû ye, lê di deh salên borî de ji ber krîza aborî û siyasî û şerê çekdarî gelekî zêde bûye.

Baregeha Lutka ya Karûbarên Penaberan li Iraqê li parêzgeha Silêmaniyê ye û nûnerên wê li Tirkiye, Yewnanîstan, Romanya, Bulgaristan, Îtalya, Hollanda, Malta, Swêd, Norwêc, Sûriye, Almanya, Brîtanya, Kanada û Amerîkayê jî hene. 

PUKMEDIA