Serok daxwaza Karekî Bilez Dijî Gendeliyê û Bihêzkirina Demokrasiyê dike

Buroya Çapemeniyê ya Serokomariyê

Serokomar Ebdulletîf Cemal Reşîd û Serokê Dadgeh Casim Mihemed El-Amairî

Serokomarê Iraqê Ebdulletîf Cemal Reşîd li baregeha nû Dadgeha Bilind a Federalî li Bexdayê bi Serokê Dadgeha Bilind a Federalî, dadwer Casim Mihemed El-Amairî û endamên dadgehê re civiya.
Civînê bi fermî vekirina avahiya nû ya Dîwanê nîşan da û bû derfetek ji bo gotûbêjkirina pirsgirêkên neteweyî.

Serok Reşîd bi boneya vekirina navenda nû pîrozbahî li Serokê Dadwerî û endamên dadgehê kir û hêviya serkeftinê ji bo bicihanîna erkên xwe yên destûrî xwest.

Her wiha tekezî li ser rola giring a Dadgeha Bilind a Federalî li parastina destûrê û pêşxistina serweriya yasa li Iraqê kir.

Serok di axaftinên xwe de balkişand li ser pêşketinên ku Iraq di warê rêvebirina demokratîk de bi dest xistiye, tevî ku dîroka xwe ya kêm jî heye. Wî amaje bi wê yekê jî kir ku serkeftinên Iraqê di warê rêzgirtin li prensîbên destûrî cihê şanaziya niştimanî ye. Lê wî hişyarî da li ser metirsiya biryardana yekalî û meylên otorîter û tekezî li ser bihêzkirina pirosesên demokratîk ên Iraqê kir.

Serok Reşîd got, "Ji bo pêşîgirtina li biryarên yekalî û pêkanînên dîktatorî, pêwîst e bi lezgînî pêvajoya demokratîk bê xurtkirin."

Serokatî tekezî li ser pabendbûna Serokatiyê ya li ser parastina destûrê kir û ew yek weke kevirê bingehîn ê demokrasiya Iraqê û belgeyeke girîng ji bo parastina mafên welatiyan bi nav kir.
"Her binpêkirina destûrê binpêkirina mafên gelê Iraqê ye," wî tekez kir.

Serok Reşîd her wiha banga xurtkirina hevkariyê di navbera saziyên dewletê de kir ji bo pêkanîna bi bandor a yasayan, cîbicîkirina erkên yasayî û cîbicîkar û dabînkirina pêdiviyên welatiyan. Wî tekezî li ser giringiya pabendbûna bi çarçoveyên yasayî ji bo parastina pereyên giştî û rûbirûbûna gendeliyê li ser hemû astên hikûmetê kir.

Serokê Dadgehê Casim Mihemed El-Amairî spasiya serdana Serok û berdewamiya piştgiriya ji bo karê dadweriyê kir. Wî pabendbûna Dadgehê ji bo cîbicîkirina erkên xwe yên destûrî bi awayekî serbixwe û pîşeyî dubare kir.

Wî her wiha pesna dilsoziya Serok Reşîd ji bo parastina destûrê û piştgiriya serxwebûna dadweriyê kir, û balkişand li ser serkirdayetiya wî di parastina cihêbûna desthilatan de.

Casim Mihemed El-Amairî  li ser hewlên Dadgehê ji bo pêşvebirina dadweriyê, cîbicîkirina yasa û rêzikên federalî û parastina mafên siyasî, aborî û civakî yên hemwelatiyên Iraqî, nêrînek pêşkêş kir. Wî tekezî li ser erkê Dadgehê kir ku serweriya qanûnê di hemû aliyên rêveberiyê de serdest bike.

PUKMEDIA