Hikûmetê ev 6 meh in bersiv nedaye daxwaza xizmên şehîd û mexdûrên Enfalê

PUKMEDIA

Civîna rojnamevanî ya xizmên şehîd, qurbaniyên Enfalê û girtiyên siyasî

Nêzîkî 6 meh in Hikûmeta Herêma Kurdistanê bersiva nameya malbatên şehîdan, qurbaniyên Enfalê û girtiyên siyasî nedaye. Xizmên wan di konferansê de gotin: “Heta daxwazên me neyên cîbicîkirin em ji Hewlêrê dernakevin.

"Em ji Hewlêrê dernakevin"

Îro li Hewlêrê xizmên şehîd, qurbaniyên Enfalê û girtiyên siyasî civîneke rojnamevaniyê li dar xistin û ragihandin:“Nêzî 8 caran em hatine Hewlêrê û daxwaza dayîna mûçeyên xwe dikin, lê mûçeyên me nehatine dayîn.Di 22’ê Adara 2024’an de Wezareta Karûbarên Şehîdan û Mexdûrên Enfalê ji Wezareta Darayî û ji wir jî ji Encumena Wezîran re nivîsî da ku mexdûriyeta zêdeyî 25 hezar xizmên şehîd, enfalkiriyan û girtiyên siyasî bên dayîn.’’

 “Lê piştre Encumena Wezîran di 22’ê Tebaxa 2024’an de bi hinceta nebûna pereyan ew name bi cih neanîn û ji Wezareta Darayî re vegerandin.Xizmên şehîdan, mexdûrên enfalkiriyan û girtiyên siyasî gotin,nêzî 8 caran em hatine Hewlêrê da ku daxwazên xwe bi cih bînin û mûçeyên xwe werbigirin."

25 sal li Iraqê û 10 sal li Herêma Kurdistanê

Li gorî yasayê xizmên şehîdan û girtiyên siyasî li Iraqê 25 salan mûçeyê distînin, lê li Herêma Kurdistanê 10 salan mûçeyê werdigirin.

Wezîrê Karûbarên Şehîdan û Qurbaniyên Enfalê Ebdullah Hacî Mehmûd wiha got: “Me li gel hikûmeta Iraqê projeyek amade kiriye ku mûçeyên malbatên şehîdan, enfalkiriyan û girtiyên siyasî bidin û ji mafên wan bê par nemînin.Berê 5 hezar û 212 kes ji xizmên şehîd, mexdûrên enfalkirî û girtiyên siyasî mûçe werdigirtin, lê yasaya 25 salan a Iraqê ji me cuda ye, em dixwazin hemû kes mafên xwe bistînin.’’

Zêdetirî 25 hezar kes ji xizmên şehîd, enfalkiriyan û girtiyên siyasî hene ku pereyê xwe wernegirtine, lê li Iraqê 25 salan alîkariyê werdigirin, lê li Herêma Kurdistanê 10 salan alîkariyê werdigirin.

PUKMEDIA