H.Kemal Axa: Sinor derbazkirin, binpêkirina serweriyê ye

PUKMEDIA

Herêm Kemal Axa

Serokê firaksyona Yekîtî ya Nîştimanî ya Kurdistanê li civata nûberên Êraqê, tekez kir ku, êdî çi pirsgirêkek hûnerî nemaye ji bo şandina mûçeyên Pêşmerge û hêzên ewlekariya herêmê,got jî: Pêwîste valatiyên ewlekariyê li deverên qutkirî bên tejîkirin, û daxwaz ji hikûmeta fedral kir ku rêgiriyê li binpêkirina serweriya Êraqê bike ku ji aliyê welatên hevsê ve tên kirin.

Çareserkirina pirsgirêka hêzên ewlekariyê

Herêm Kemal Axa; Serokê firaksyona Yekîtî ya Nîştimanî ya Kurdistanê li civata nûberên Êraqê di hevpeyvînekê de digel malpera fermî yê Yekîtî Nîştimanî ya Kurdistanê PUKMEDIA ragihand ku dîwana çavdêriyê li herêm û Bexdayê hûrbînî di lîsta mûçeyên hêzên ewlekariyê de bi dawî kiriye û êdî çi pirsgirêkek hûnerî ne maye di ve derbarê de, û di vê hefteyê de mûçeyên heyvên Gulan û Hizêranê yên Pêşmerge û hêzên ewlekariya herêma Kurdistanê dê bên şandin, got jî: Me wek firaksyona Yekîtî ya Nîştimanî ya Kurdistanê hertimî hewl da ku van pirsgirêkan bi awayekî bingehîn çareser bikin daku bi behaneyên cûr bi cûr neyên dubarekirin.

Derbarê sedema dubare paşdaxistina şandina mûçeyên herêmê bi taybet yên Pêşmerge û hêzên ewlekariyê, Herêm Kemal Axa got: Encamdana hûrbîniyê di lîsta mûçeyan de ji aliyê dîwana darayî ya fedral ve demek kişand, lê piştre bi dawî bû û dîwana çavdêriya darayî raporta xwe şand ji hikûmeta fedral re, û serok wezîrên Êraqê Mihemed Şeyah Sûdanî fermana şandina mûçeyan da, lê di vê hefteyê de mûçe dê bên şandin, û tekez kir ku firaksyona Yekîtî ya Nîştimanî ya Kurdistanê her demê di peywendiyan de bûye ji bo çareserkirina vê pirsgirêkê.

Serokê firaksyona Yekîtî ya Nîştimanî ya Kurdistanê li civata nûnerên Êraqê aşkere jî kir ku li gor biryara dadgeha fedral,pêwîste hemî mûçeyên herêma Kurdistanê bên şandin, wek hemî deverên din yên Êraqê, li hemberî wê jî dive hikûmeta herêma Kurdistanê jî pabend be li hemberî hikûmeta fedral û pirsgirêkên wek dahatên ne neftî û  dahatên deriyên sinorî û dosye ya neftê çareser bike, daku welatî ji niha û pêve baca van pirsgirêkan bidin.

Tejîkirina valatyên ewlekariyê

Derbarê livînên terorîstên DAIŞê li deverên ku valatiyên ewlekariyê yên di navbera hêzên Pêşmerge û hêzên fedralî têde hene û çawaniya tejîkirina van valatiyan, Herêm Kemal Axa  got: Hefteya bûrî ez digel serok erkanê artêşa Êraqê, Ebdulemîr Yarulah civiyam û me behsa vê babetê kir, û me tekez kir ku pêwîste valatiyên ewlekariyê li wan deveran bên tejîkirin daku dubare terorîstên DAIŞê xwe bi rêxistin nenkin.

Rêzgirtin li serweriya Êraqê

Derbarê destdirêjiyên ser serweriya Êraqê û hêrişên serbazî li ser hindek deverên herêma Kurdistanê jî got: Herêma Kurdistanê beşek ji Êraqê ye, lewra pwîste hikûmeta fedral parastina serweriya Êraqê bi hemahengî digel hikûmeta herêmê bike,lê tiştê em îro dibînin mixabin, binpêkirina serweriya Êraqê û binpêkirina yasa û normên navdewletî ye,tekez jî kir ku çi rêkeftineke fermî di navbera Bexda û Enqre de jibo derbarzbûna hêzên Turkiye bo nav axa herêmê nîne, û civata wezîran jibo ewlekariya nîştimanî, operasyonên Turkiye li parêzgeha Duhokê şermezar kir û biryar da ku şandeke ewlekariyê bi serokatiya şêwirmendê ewlekariya nîştimanî Qasim Ehrecî sardana herêmê bike daku ji nêzîk ve zanyariyên berfireh di wê derbarê de werbigire.

PUKMEDIA