Talebanî: Em ê Pêşmerge bihêztir û profesyoneltir bikin

Daxuyaniya Qubad Talebanî

Talebanî û şandeke leşkerî ya Almanî

Cîgirê Serokwezîr Qubad Talebanî pêşwaziya şandeke leşkerî ya Almanyayê bi serokatiya Fermandarê hêzên Almanyayê li Herêma Kurdistanê Kolonel Lars Persikowski kir. Di civînê de proseya çaksaziya li Wezareta Pêşmerge û çendîn mijarên din ên girêdayî hêzên Pêşmerge hatin gotûbêjkirin.

Di civînê de ku roja duşemê bi amadebûna Şoreş Îsmaîl Wezîrê Pêşmerge û Klaus Streicher Konsolê Giştî yê Almanyayê hat lidarxistin, her du alî li ser berdewamiya proseya çaksaziyê li Hêzên Pêşmerge hemfikir bûn û tekez li ser birêxistinkirina baştir a hemû hêzan kirin.

Di beşeke din ya hevdîtina han de, şanda leşkerî ya Almanya nêrîna xwe ya ji bo pîşeyîkirina zêdetir ya hêzên pêşmerge di çarçoveya bernameya bihêztir kirina karînên hêzên pêşmerge de pêşkêş kir û behsa perwerde kirina hêzên pêşmerge di warê tendirustî û çareseriya bilez de hate kirin. 

Cîgirê Serokwezîr spasiya alîkariyên hêzên Almanyayê bo Pêşmerge kir, bi taybetî di warê rahênan û piştgiriya  lojîstîkî de û hêvî xwest ku ew alîkarî berdewam bin.

Di civînê de behsa rewşa jinên di nava hêzên Pêşmerge de jî hate kirin û behsa çawaniya perwerdekirina zêdetir hêzên jin ji bo pêkanîna erkên xwe bi awayekî profesyoneltir hate kirin.

PUKMEDIA