Talebanî ji Balyozê Koreyê re: Em ê kapasîteya ciwanan pêş bixin

Buroya Çapemeniyê ya Qubad Talebanî

Qubad Talebanî û Choi Sung-Su

Cîgirê Serokwezîr Qubad Talebanî pêşwaziya Balyozê Koreya Başûr li Iraqê Choi Sung-Su  kir û di wê hevdîtinê de proseya hikûmeta elektronîk û çend mijarên din hatin gotûbêjkirin.

Di civînê de ku roja çarşemê (29.05.2024) li Hewlêrê hat lidarxistin, Cîgirê Serokwezîrê Herêma Kurdistanê spasiya alîkariya Koreya Başûr bo Herêma Kurdistanê kir û hêvî xwest ku alîkariyên wî welatî bi taybetî di warê veguhestina ezmûn û şarezayên di warê hikûmeta elektronîk de bo Kurdistanê berdewam be. 

Balyozê Koreya Başûr piştgiriya  welatê xwe ji bo Herêma Kurdistanê dûpat kir û amadehiya xwe jî bo alîkariya di proseya hikûmeta elektronîk de nîşan da.

Di vê çarçoveyê de cîgirê serokwezîr amaje bi wê yekê jî kir ku hikûmeta Herêma Kurdistanê di van salên dawî de bi piştgîriya li ser ciwanên Kurd yên jêhatî û nûjen, qonaxeke pir pêşketî di saziyên hikûmeta elektronîk de derbas kiriye û got, lê dîsa jî hewcedariya me bi alîkariya welatek pêşkeftî wekî Koreya Başûr heye." Wî got.

Di hevdîtinê de Qubad Talebanî diyar kir ku di nava ciwanên Kurd de mirovên nûjen ên gelek jêhatî di warên teknolojî û karsaziyê de hene û got, stratejî û plana me ew e ku şiyana ciwanên xwe yên nûjen zêdetir pêş bixin û beşdar bibin di dîtina çareseriyên zîrek ji bo pirsgirêkên curbicur.
Di vê çarçoveyê de Cîgirê Serokwezîr daxwaz ji Koreya Başûr kir ku ji bo pêşxistina şiyana ciwanên afirîner ên Kurdistanê alîkariya Herêma Kurdistanê bike.

PUKMEDIA