Talebanî: Divê îsal hilbijartin bên kirin

Buroya Çapemeniyê ya Qubad Talebanî

Qubad Talebanî û Cîgirê Konsulê Giştî yê Almanyayê

Cîgirê Serokwezîr Qubad Talebanî li gel Cîgirê Konsulê Giştî yê Almanyayê li Herêma Kurdistanê Benjamin Hanna civiya û di civînê de behsa hilbijartinên Parlamentoya Kurdistanê, destpêkirina hinartina petrolê û çendîn mijarên din ên balkêş hatin kirin.

Di civînê de ku roja 29.05.2024ê li Hewlêrê hat lidarxistin, Cîgirê Serokwezîr tekez li ser wê yekê kir ku em hemû hewlên xwe didin ji bo ku di yekem derfetê de û îsal hilbijartin bên kirin.

Derbarê kursiyên pêkhatan  de jî Qubad Talebanî diyar kir ku em ê mafên hemû civakan bê cudahî biparêzin û got:“Em ti carî li dijî kursiya pêkhatan nebûne, lê daxwaz û hewla me ew e ku nûneratiya xwe ya rast li parlamentoya Kurdistanê de hebe.

Her wiha di civînê de li ser destpêkirina hinartina petrolê û mijara bûdceyê jî gotûbêj hatin kirin,cîgirê  Serokê Hikumeta Kurdistanê her wiha got: “Hikûmeta Herêma Kurdistanê hemû amadeyiya xwe nîşan daye ku careke din hinartina petrolê dest pê bike,em ê ji bo ji nû ve destpêkirina pêvajoyê nebin pirsgirêk.’’

Derbarê pirsa bûdce û mûçeyê karmendên Herêma Kurdistanê de jî, Qubad Talebanî got ku ji bo çareserkirina pirsgirêkan gavên baş hatine avêtin û ragihand:“Şanda hikûmetê amade ye serdana Bexdayê bike û em bi niyaz in ku ji bo çareserkirina pirsgirêkên bûdce û mûçeyan bigihin rêkeftineke dawî.’’

Di mijara dawî ya civînê de behsa avakirina zanîngeheke Kurdî-Almanî li Silêmaniyê hat kirin, Qubad Talebanî piştgiriya hemû pêkhateyan û amadebûna hikûmeta Herêma Kurdistanê ji bo dabînkirina hemû hêsankariyan ji bo vekirina zanîngehê nîşan da.

PUKMEDIA