Talebanî: Pêwendiyên Herêma Kurdistanê û Bexdayê di asteke baş de ne

PUKMEDIA

Qubad Talebanî û Balyozê Romanyayê

Cîgirê Serokwezîr Qubad Talebanî pêşwaziya Balyozê Romanya yê li Iraqê Rado Octavian Dobre kir û di civînê de çendîn mijarên balkêş hatin gotûbêjkirin.

Civîna roja duşemê (27.05.2024) û bi amadebûna Cîgirê Berpirsê Fermangeha Pêwendiyên Derve ya Herêma Kurdistanê Daban Şadala û Konsulê Giştî yê Romaniya li Herêma Kurdistanê Petre Constantin hat lidarxistin. Her du alî hevdeng bûn li ser bihêzkirina têkeliyên navbera Romanya û Herêma Kurdistanê bi taybetî di warê bazirganî û xwendina bilind de.

Di vê çarçovê de behsa handana sermayedarên Romanî ji bo sermayerazandinê li Kurdistanê bi taybetî di warê keresteyên xwarinê de hate kirin. Cîgirê Serokwezîrê Herêma Kurdistanê amadehiya Hikûmeta Herêma Kurdistanê ji bo dabînkirina her cure asankariyê bo kompanyayên welatê wan ji bo beşdariya di pirosesa geşepêdana aborî ya herêmê de nîşan da.

Li beşekî dinê vê hevdîtinê de behsa pêşxistina peywendiyên akademîk di navbera her du zanîngehan de hate kirin. Qubad Talebanî amaje bi wê yekê jî kir, ku niha hejmarek ji xwendekarên Kurd li zanîngehên Romanyayê dixwînin, daxwaz ji hikûmeta Romaniyayê kir ku asankariya zêdetir bo wan xwendekaran bike û di pêşerojê de kar ji bo wergirtina zêdetir xwendekarên Kurd li zanîngehên wî welatî bike.

Di hevdîtinê de behsa peywendiyên navbera Herêma Kurdistanê û Bexdayê jî hat kirin. Cîgirê Serokwezîr pêşhatên dawî ji Balyozê Romaniyayê re şîrove kir û got ku niha peywendî wan di asteke baş de ne û ji bo çareserkirina pirsgirêkan gavên baş ji her du aliyan re hatine avêtin, bi taybetî bûdce û mûçeyên karmendên hikûmeta Herêma Kurdistanê.

PUKMEDIA