Partiya Zehmetkêşan: Helwestên YNKê bi nirx in

PUKMEDIA

YNK pêşwaziya Partiya Zehmetkêşan dike

Şandeke bilind a Partiya Zehmetkêşanê Kurdistanê serdana Mekteba Siyasî ya Yekîtiya Niştimanî ya Kurdistanê li Hewlêrê kir.

Şanda bi serokatiya Balen Ebdullah ji aliyê Berdevkê Yekîtiya Niştimanî ya Kurdistanê (YNK) Saadî Ehmed Pîre, Sekreterê Encumena Piştgiriyê Hacî Mesifî û endamên Serkirdayetiyê Rêbaz Berkotî û Rebîha Hemad ve hat pêşwazîkirin.

Di daxuyaniya çapemeniyê de ku ji PUKMEDIA re hatiye şandin, di civînê de behsa dîroka têkoşîna hevbeş û peywendiya demdirêj a YNK û Partiya Zehmetkêşan di xeta niştimanî ya parastina maf û daxwazên gelê Kurd de hatiye kirin.

Sekreterê Partiya Zehmetkêşanê Kurdistanê Balen Ebdullah pesna helwêstên niştimanî yên Yekîtiya Niştimanî ya Kurdistanê (YNK) kir û daxwaz ji Yekîtiya Niştimanî ya Kurdistanê kir ku rola xwe di derbaskirina rewşa siyasî ya niha ya Herêma Kurdistanê û başkirina peywendiyên di navbera Herêm û Bexdayê de bilîze. 

Balen Ebdullah :“Em dixwazin bi şêwirîna li gel hemû hêz û aliyên din ên siyasî yên Kurdistanê gavên erênî ji bo çareserkirina pirsgirêkan bavêjin da ku bigihin xaleke hevbeş û ji hev têbigihin li ser mijarên siyasî û stratejîk ên girêdayî pêşeroja Herêma Kurdistanê.’’

Ji aliyê xwe ve, Saadî Ehmed Pîre spasiya têbîniyên şanda mêvan kir û got: ‘’YNK hertim alîgirê çareserkirina pirsgirêkan e , bi rêya diyaloga yasayî û aştiyane ye di çarçoveya parastina maf, îmtiyaz û destkeftên gelê Kurd de. YNK li gel guhertin û nûkirina sîstema rêveberiya Herêma Kurdistanê ye.”

PUKMEDIA