Rojnamevan Umêd Beroşkî hat revandin

PUKMEDIA

Rojnamevan Umêd Beroşkî

Piştî rûniştina ku rojnamevan Şêrwan Şêrwanî lê dihat darizandin, rojnamevan Umêd Beroşkî yê ku Mesrûr Barzanî rexne kiribû, ji aliyê PDK’ê hate revandin.
Duh Dadgeha Hewlêrê bi tometa ‘sextekariyê’ 4 sal cezayê girtîgehê li Şêrwan Şêrwanî birîbû.
Parêzerê girtiyên Behdînanê Remezan Hertîzî têkildarî biryara dadgehê daxuyaniyek dabû çapemeniyê û gotibû “Dadgeha Hewlêrê li gorî madeyên 295 û 298, bi tometa ‘sextekariyê’ 4 sal cezayê girtîgehê li Şêrwan Emîn birî, ku ev yek jî nebûna serweriya yasa û dadgehên Herêma Kurdistanê nîşan dide.”
Yek ji hevalên Şêrwan Şêrwanî, Umêd Beroşkî jî têkildarî 4 sal cezayê ku li Şêrwan Şêrwanî hatiye birîn duh axivî û gotibû; “Dadgehê 4 sal ceza li Şêrwan Şêrwanî biriye, ev biryara Serokê Hikûmeta Herêma Kurdistanê Mesrûr Barzanî ye. Bi fikir û hişmendiya leşkerî û îstîxbaratî welat nayên birêvebirin. Lewra ev biryar li dijî dengê nerazî yê Behdînanê hat dayîn. Pêwîst e em li dijî vê biryarê bin û helwestê nîşan bidin.”
Piştî vê daxuyaniyê, Umêd Beroşkî duh bişev hate revandin.
Nûnerê Girtiyên Behdînanê Ayhan Seîd da zanîn ku duh bi şev rojnamevan Umêd Beroşkî li Dihokê ji aliyê hêzên ewlekariyê ve hatiye revandin.
PUKMEDIA