Talebanî: ji rewşa siyasî ya niha ne kêfxweş im

PUKMEDIA

Cîgirê Serokwezîr û Konsulê Giştî yê Fransa

Cîgirê Serokwezîr Qubad Talebanî pêşwaziya Olivier Dicotine Konsulê Giştî yê Fransa li Herêma Kurdistana Êraqê kir û di civînê de pêşhatên dawî yên siyasî, peywendiyên navbera Herêma Kurdistanê û Bexdayê û pirsa proje yasaya bûdceya Êraqê gotûbêj kirin.
Qubad Talebanî di civîna îro de li Hewlêrê derbarê rewşa navxweyî ya Herêma Kurdistanê de got:Ez ji rewşa niha ya herêmê ne dilxweş im û pêdvîye peywendiyên di navbera partiyan de baştir bibûna, bi taybetî ku îro ji her demê zêdetir pêwîstiya Kurdan bi yekrêzî û rêkxistina navxweyî heye, ji ber ku niha pirsgirêkên  li pêşiya Kurdistanê mezintir û berçavtir bûne.
Her wiha got jî; Hîn dem maye ku alî bi liberçavgirtina metirsiyan bigihin rêkeftinekî ku ji bo vê qonaxê guncaw e.Di derbarê helwesta Herêma Kurdistanê li Bexdayê û peywendiyên di navbera Herêma Kurdistanê û Bexdayê de jî Cîgirê Serokwezîr got; Tişta ku li Bexdayê diqewime rewşa navxwe ya Herêma Kurdistanê nîşan dide, ji ber wê jî divê berî her tiştî em xwe birêxistin bikin, piştre li Bexdayê bihêztir û yekgirtîtir xuya bikin û bi hev re baştir berevaniyê li mafên xwe yên destûrî bikin. "Ji bo bidestxistina vê lihevkirinê, divê em hemû helwestên xwe binirxînin," wî got.
Di dawiyê de, Qubad Talebanî spasiya Konsulê Giştî yê Fransa kir ku pisporên çaksaziyên aborî ji Ofîsa Cîgirê Serokwezîr re terxan kiriye da ku di cîbicîkirina planên çaksaziyê de alîkar bin.
PUKMEDIA