Dawûd Cundî: PDK koçberan li gor berjewendiyên xwe bikar tîne

PUKMEDIA

Şengal

Endamê Encûmena Serkirdayetiya Yekîtiya Niştimanî ya Kurdistanê Dawûd Cundî tekez kir ku Partiya Demokrata Kurdistanê piştî rûxana rêjîma berê li Şengalê desthilatdar bû, lê ti tişt di rastiya bajêr de neguhert û di birêvebirina dezgeha dadwerî di warê ewlehî û îdarî de têk çû, û belgeya herî mezin ji bo wê jî revîn û vekişîna hêzên wê yên leşkerî di dema êrîşa rêxistina terorîst a DAIŞê de û radestkirina bi hezaran êzîdiyên bêguneh ji bo DAIŞê ye.

Dawûd Cundî di daxuyaniyeke taybet de ji PUKMEDIA re got: Partiya Demokrat ev 8 sal koçberên Şengalî ên di kampan de bi kar tîne di her prosesa hilbijartinan de ji bilî wergirtina alîkariyên madî ji xêrxwazan li ser hesaba awareyan, ji bilî danîna sînoran û rêgirtin li vegera awareyan û daxuyaniya vê dawiyê ya wezîrê koç û koçberên Êraqê jî belgeyeke baş e.

Û wî diyar kir: Wek her kes dizane niha Herêma Kurdistanê di qonaxekê de ye ku ji aliyê Partiya Demokrat ve bi yek desthilatdar tê naskirin, bi taybetî li parêzgeha Duhokê û hewl dide dengên azad qut bike, lê heta niha kesek ji wan kesên ku di vê dawiyê de hereşe li ser Êzdiyan kiribûn  ne hatine cezakirin, lê wan dîsa tenê lêborîna xwestin bêyî ku ti tedbîrek rastîn ku wan bi axaftinên nefretê û binpêkirinên li dijî gelê Êzidî yên ku rastî tawanên herî hovane ji aliyê terorîstên DAIŞê ve hatine kirin, sînordar bike.
Derbarê lidarxistina hilbijartinên Herêma Kurdistanê de jî Daûd Cundî got: Yekîtiya Niştimanî ya Kurdistanê herdem amadeye ji bo vê piroseya demokratîk, lê rêjîma deshilatdar ya ku ji aliyê Partiya Demokrat ve tê birêvebirin, sedema sereke ya van nakokî û pirsgirêkên Herêma Kurdistanê ye. bi bikaranîna kotaya pêkhateyên olî û kêmneteweyên li herêmê re li gor berjewendiyên xwe derbas dibe, ji ber ku em tekez dikin ku em li gel mafê hemû pêkhateyan ne, bi taybet gelê Êzidî bi mercê ku ew nûnerên rasteqîn bin û nebin alavek di destê demokratan de!.

PUKMEDIA