Wezîra derve ya Almaniya piştgiriya welatê xwe ji Herêmê re pişt rast kir

Nivîsgeha Ragihandinê yê cîgirê serokwezîr

Wezîra Derve ya Almanyayê Analina Baerbock û Qubad Talebanî

Cîgirê Serokê Hikûmeta Herêma Kurdistanê Qubad Talebanî spasnameyek ji Wezîra Derve ya Almanyayê Analina Baerbock wergirt.

Wezîra Derve ya Almanyayê di peyama xwe de tekezî li ser bihêzkirina peywendiyên navbera Hewlêr û Bexdayê li gor bingehên nû û belgekirî ji bo bikar anîna gelek serwetên Êraqê bi baştirîn şêwe ji bo aramiya welatiyan kir.
Di wê peyamê de wezîra Derve yê Almanyayê spasiya pêşwaziya germ a Qubad Talebanî di serdana xwe ya bo Herêma Kurdistanê kir û tekezî li ser berdewamiya pişgirî û piştevaniya Almanya bo Herêma Kurdistanê ji bo parastina aramiyê û dabînkirina jiyaneke rihet ji bo welatiyên Kurdistanê kir.

Annalina Berbuk amaje bi wê yekê jî kir ku Herêma Kurdistanê xwedî hebûneke baş a ciwan û xwende ye û Qubad Talebanî di civîna hevbeş de jêre got ku pêwîst e ji vê derfetê sûd werbigirin da ku Herêma Kurdistanê bikeve ser riyeke nû ya dabînkirina pêşerojeke geştir ji bo welatiyan.
Wezîra derve ya Almanya piştevaniya xwe ji bo vê nêzîkatiya Qubad Talebanî dupat kir û daxwaz ji Herêma Kurdistanê kir ku giringiyê bi guherîna keşûhewayê bide ji ber ku di paşerojê de kêşeyeke mezin e li pêşiya Herêma Kurdistanê û Êraqê.

PULMEDIA