Serok Bafil ji nivîskaran re: Min jî rexne bikin

PUKMEDIA

Bafil Celal Talebanî bi çend nivîskaran û wêjevanan re civiya

Serokê Yekîtiya Niştimanî ya Kurdistanê (YNK) Bafil Celal Talebanî li Dabaşanê bi çend nivîskaran re civiya.
Di civînê de ku Şalaw Kosret Resûl û Stran Ebdullah endamên mekteba siyasî amade bûn, rewşa çand, nivîskar, azadiya derbirînê û berfirehkirina qadên azadiya gotûbêjan hate gotûbêjkirin û çendîn pêşniyarên girîng hatin pêşkêşkirin.
Serok Bafil Celal Talebanî bal kişand ser rol û pêgeha nivîskaran û wêjevanan di qonaxên cuda yên dîroka Kurdistanê de û hewlên wan ên ji bo pêşxistin û hişyarkirina civakê û got:“Kurd xwedan mîraseke dewlemend a wêjeyî û çandî ye û di vî warî de dîrokeke me ya geş heye, nivîskarên Kurd û berhemên wan li seranserê cîhanê tên pêşwazîkirin û ev yek ji bo me cihê şanaziyê ye. Wî got: “Nivîskaran di qonaxa dijwar a têkoşînê de roleke girîng lîstine û heta niha jî bandoreke wan a berçav di civakê de heye, ji ber wê jî YNK hewlên we ji bîr nake û bi serbilindî alîkariya we dike.
Derbarê pirsa azadiya derbirînê û bisînorkirina hewlên nivîskarên Herêma Kurdistanê de jî got;  “Dîroka Yekîtiya Niştimanî ya Kurdistanê (YNK) bi gelek nivîskarên bi nav û deng e ku kedeke girîng di partiyê de dane û ji bo Kurdistanê bêwestan têkoşîn kirine.YNKê jî piştgiriyek mezin ji nivîskaran re bû. Em hertim alîgirê xurtkirina bingehên demokrasî û ramana azad bûn û hewlên Serok Mam Celal û Hêro Xan jî di vî warî de şahidiya vê yekê dikin,eger li cihekî din hewldaneke wiha ya sînordarkirina azadiyê hebe, em li gel wê nînin û ez hêvîdar im ku rûyê herêman li pêşberî civaka navdewletî xirab nebe.
Serok Bafil bang li nivîskaran kir ku xizmetê ji raya giştî û geşkirina çanda Kurdî re bikin û got:“Bi tundî rexnegirekî rewşê bin û ji Bafil Celal Talebanî dest pê bikin. Nivîsandin erkek e û we berpirsyariyeke mezin û dîrokî heye û li hember xwendevanên xwe bibin pênûsek rast û giran.
Di derbarê hemahengî û berfirehkirina peywendiyên di navbera nivîskarên her çar parçeyên Kurdistanê de jî Serok Bafil daxwaz ji wan kir ku peywendiyên xwe berfiretir û bihêztir bikin û bi hev re xizmeta çand û zimanê Kurdî yê şîrîn bikin.
Di derbarê têbînî û pêşniyarên nivîskaran ji bo pêşvebirina bizava edebî û rewşa nivîskarên Herêma Kurdistanê, çend biryarên giring hatin standin, her wiha got: “Hûn şanaziya me û hemû gelê Kurdistanê ne, ji ber wê jî emê di paşerojê de bersiva hewlên we bidin û em soz didin ku li ser piştgiriya  we berdewam bin’’.
PUKMEDIA