وەزارەتی كشتوكاڵ و یەكێتيی ژنان پڕۆژەی ژن و زەوی-یان راگەیاند

PUKMEDIA

بێگەرد تاڵەبانی، وەزیری كشتوكاڵ و سەرچاوەكانی ئاوی حكومەتی هەرێم

وەزارەتی كشتوكاڵ و یەكێتیی ژنانی كوردستان، بۆ پاڵپشتیی ژنانی جوتیار، پڕۆژەی ژن و زەوی-یان راگەیاند، وەزیری كشتوكاڵیش دەڵێت: دەتوانین لەڕێی پڕۆژەیەوە پاڵپشتی ژنانی جوتیار بكەین و پەرە بەتواناكانیان بدەین.

ئەمڕۆ 4ی 10ی 2026، لەمەڕاسیمێكدا، بە ئامادەبوونی بێگەرد تاڵەبانی، وەزیری  كشتوكاڵ و سەرچاوەكانی ئاوی حكومەتی هەرێم و لاڤە حیكمەت، سەرپەرشتیاری گشتیی یەكێتیی ژنانی كوردستان، پڕۆژەی (ژن و زەوی) بۆ پاڵپشتیی ژنانی جووتیار، راگەیەندراو هەردوولا یاداشتنامەیەكی لێكتێگەیشتنیان ئیمزاكرد.

لەمەڕاسیمەكەدا، بێگەرد تاڵەبانی، وەزیری  كشتوكاڵ و سەرچاوەكانی ئاوی حكومەتی هەرێم رایگەیاند: (ژن و زەوی) پڕۆژەیەكی گرنگ و ستراتیژییە، چونكە بەیەكەوە باشتر دەتوانین پاڵپشتی ژنانی جوتیار بكەین و پەرە بەتواناكانیان بدەین، لە سنووری پارێزگای سلێمانی و هەڵەبجەو ئیدارە سەربەخۆكانی سۆران و گەرمیان و دواتر سەرجەم هەرێمی كوردستان. 

وتیشی: ئەم پڕۆژەیە، بەشێكە لەو كلتورەی كە لەسەرەتای دەستبەكاربوونمانەوە لە وەزارەتی كشتوكاڵ ویستوومانە یەكەیەكی یەكسانی جێندەریی و هەنگاوی پێویست بەئاڕاستەی دروستكردنی پەیوەندییەكی دروست لەگەڵ ژناندا بنێین، هاوكات لەم رێگەیەوە دەرگایەكی ئابوری بەڕووی ژناندا دەكەینەوەو دەتوانین پەرە بەتواناكانیان بدەین.

پڕۆژەی (ژن و زەوی)، كە پڕۆژەیەكی هاوبەشی وەزارەتی  كشتوكاڵ و سەرچاوەكانی ئاوی حكومەتی هەرێم و یەكێتیی ژنانی كوردستانە، ئامانجییەتی لە ڕێگەی دابینکردنی بنەتۆوی گەنم و خولی ڕاهێنانەوە، پاڵپشتیی ژنانی جوتیار بکات و سەربەخۆییی ئابوورییان بەهێز بکات. 

PUKMEDIA