قوباد تاڵەبانى پەیامێک دەربارەى کشانەوەی هێزەکانى هاوپەیمانان بڵاودەکاتەوە

نوسینگەى راگەیاندنى قوباد تاڵەبانی

قوباد تاڵەبانی

قوباد تاڵەبانى جێگرى سەرۆکى ئەنجومەنى وەزیرانى هەرێمى کوردستان رایگەیاند: لە رۆژی کۆتاییهاتنی ئەرکی هاوپەیمانان و کشانەوەی هێزەکانیان لە عیراق و هەرێمی کوردستان، بە سوپاس و پێزانینەوە لە هەموو هاوکارییەکانیان دەڕوانین بۆ هێزەکانی پێشمەرگە و سوپای عیراق لە شەڕی بەرەنگاربوونەوەی تیرۆر و پاراستنی ئاسایش و سەقامگیریی عیراق و کوردستان.

دەقى راگەیەندراوەکەى قوباد تاڵەبانى:

لە رۆژی کۆتاییهاتنی ئەرکی هاوپەیمانان و کشانەوەی هێزەکانیان لە عیراق و هەرێمی کوردستان، بە سوپاس و پێزانینەوە لە هەموو هاوکارییەکانیان دەڕوانین بۆ هێزەکانی پێشمەرگە و سوپای عیراق لە شەڕی بەرەنگاربوونەوەی تیرۆر و پاراستنی ئاسایش و سەقامگیریی عیراق و کوردستان. هەروەها لەم رۆژەدا یادی هەموو شەهیدانی پێشمەرگە و سوپای عیراق و هاوپەیمانان دەکەینەوە و سڵاو بۆ گیانی پاکیان دەنێرین.

ئێمە لە هەرێمی کوردستان هاوکارییەکانی هاوپەیمانان لە سێ قۆناغی گرنگ و چارەنووسسازی وەک راگەیاندنی ناوچەی دژەفڕین لە ساڵی ١٩٩١ بە تایبەت لەلایەن ئەمریکا و بەریتانیا و فەڕەنسا، رووخاندنی رژێمی دیکتاتۆری بەعس لە ساڵی ٢٠٠٣ و شەڕی تیرۆریستانی داعش لە دوای ساڵی ٢٠١٤ هەرگیز لەبیر ناکەین.

لە ئێستاشدا کشانەوەی هاوپەیمانان و گەڕانەوەی سەروەریی تەواو بۆ عیراق ساتەوەختێکی مێژوویی گرنگە بۆ عیراق و هەرێمی کوردستان و هەردوو حکومەتی فیدڕاڵ و هەرێم و هەموو هێزە سیاسییەکانی عیراق و کوردستان و هەموومان لەبەردەم بەرپرسیارێتیی گەورەداین. پێویستە بۆ هاوڵاتییانی عیراق و بۆ کۆمەڵگای نێودەوڵەتیشی بسەلمێنین کە دەتوانین پارێزگاری لە سەروەریی و ئاسایش و سەقامگیری وڵاتەکەمان بکەین، ئەم ئەرکەش بەبێ هاوکاری و پێکەوەکارکردن لەپێناو بەرژەوەندیی گشتی و بەبێ جێبەجێکردنی تەواوەتی دەستوور بەدی نایەت.

وەک هێزە سیاسییەکانی کوردستانیش لەبەردەم بەرپرسیارێتییەکی مێژووییداین. ئەرکە لەسەرمان بە یەکڕیزی و هاوبیری کاربکەین بۆ بەهێزکردنی دامەزراوە شەرعییەکان و هەنگاونان بەرەو حکومڕانییەکی باشتر و خزمەتگوزار و دادپەروەر. چونکە دواجار دەستکەوتە مێژووییەکانی گەلەکەمان تەنها بە پشتیوانی و بە متمانەی هاوڵاتییانمان دەپارێزرێت.

لە کۆتاییدا هاوڵاتییانی خۆمان دڵنیا دەکەینەوە، هاوکاری و هەماهەنگییەکی زۆرباش هەیە لەنێوان هەردوو حکومەتی فیدڕاڵ و هەرێم، هێزی پێشمەرگەی کوردستانیش لەوپەڕی ئامادەیی خۆیدایە و وەک هەمیشە ئامادەیە بۆ پاراستنی خاکی کوردستان و سەروماڵی هاوڵاتییان لە هەرچەشنە هەڕەشە و مەترسییەک گیانفیدایی بکات.

PUKMEDIA