دەستەی ناوچە كوردستانییەكان بۆ پارێزگاری كەركوك: دەستوورو ماددەی 140 نەخشەڕێگای چارەسەرن

PUKMEDIA

كەركوك

دەستەی ناوچە كوردستانییەكان لێدوانەكانی پارێزگاری كەركووك رەت دەكاتەوەو لەڕاگەیەنراوێكدا جەخت لەوە دەكاتەوە كە دەستوور بنچینەی سەرەكیی سیستمی حوكمڕانییە لە عیراقی نوێداو پابەندبوون پێوەی، رێزگرتنە لە ئیرادەی تەواوی پێكهاتەكان.

دەقی راگەیەندراوەكە:

بنچینەی سەرەكی سیستەمی حوكمڕانی لەعیراقی نوێدا دەستوری وڵاتە، كە بۆتە پەیمانێكی ڕاستەقینەو گەلانی عیراق بە تەواوی جیاوازێكانیانەوە وەك شانازییەكی گەورەی تێكۆشانیان دژی دیكتاتۆری ئاماژەی بۆ ئەكەن، پابەند بوون بەم دەستوورە تەنها پابەندیەكی یاسایی و دەستگرتن نییە بەو دەسكەوتانەی  كەبەدیهاتوون، بەڵكو رێزگرتنە لەئیرادە گەلانی عیراق، خەڵكی كوردستانیش وەك پێكهاتەیەكی گرنگی ئەم وڵاتە بە بایەخێكی زۆرەوە وێڕای تێبینییەكانی دەستی بەم بنەما بنچینەیەوە گرتوەو وەك بەری خەباتێكی دورودرێژی وێنای ئەكات، مادەی 140ی دەستووریش وەك دیاترین نەخشە رێگای خۆی بینوە بۆ چارەسەركردنی كێشەیەكی دێرینی نیشتیمانەكەی،  ئەویش پرسی ناسنامەی رووبەرێكی بەرفراوانی خاكەكەیەتی لە عیراقدا، پێمان وایە دەستوور رێگایەكی هاوسەنگی بۆ داڕشتووین بە ئاڕاستەی چارەسەركردنی ئەم پرسە لە چوارچێوەی عیراقی فیدڕاڵدا، بۆیە هەر جۆرە لێدوانێكی نادەستووری لەلایەن پارێزگاری كەركوكەوە كە پێچەوانەی دەستوور بێت جگە لەوەی رەتی دەكەینەوە بە پێویستیشی  ئەزانین لەم قۆناخە هەستیارەدا جەنابی پارێزگا گیانی پێكەوە ژیانی راستەقینە لەشارەكە زاڵبكات و خۆی بەدووربگرێت لەبەكارهێنانی دەستەواژەیەك كە پێچەوانەی دەستورو ئیرادەی راستەقینەی گەلانی عیراق بێت، لێدوان و دیداری نادەستوری رووبەری بێ متمانەی فراوان ئەكات و تەركیزیش لەسەر پرسە خزمەتگوزارێكان لا ئەدات ،كە ئەمڕۆ كەركوك لە هەمووكات زیاتر پێویستی پێیەتی.

PUKMEDIA