قوباد تاڵەبانی لەگەڵ بەرپرسانی ئیداری هەردوو قەزای کفری و رزگاری کۆبووەوە

راگەیاندنی قوباد تاڵەبانی

کۆبوونەوەی قوباد تاڵەبانی لەگەڵ بەرپرسانی ئیداری هەردوو قەزای کفری و رزگاری

قوباد تاڵەبانی، جێگری سەرۆکوەزیران لە میانەی سەردانەکەیدا بۆ ئیدارەی گەرمیان بە جیا لەگەڵ بەرپرسانی ئیداری هەردوو قەزای کفری و رزگاری کۆبووەوە.

لە کۆبوونەوەی لەگەڵ بەرپرسانی قەزای کفری، قوباد تاڵەبانی پاش گوێگرتن لە کێشە و گرفتەکانی قەزاکە رایگەیاند کفری شارێکی دێرین و مێژوویی کوردستانە و دەبێت بەشێوەیەکی شایستە خزمەت بکرێت، بەڵێنیشی پێدان هاوکارییان بێت لە خزمەتکردنی کفری و کێشە و کەموکوڕییەکان چارەسەر بکات.

لە کۆبوونەوەی دووەمدا لەگەڵ بەرپرسانی قەزای رزگاری، جێگری سەرۆکوەزیران پیرۆزبایی بە قەزابوونی لە بەرپرسانی رزگاری کرد و ئاماژەی بەوەدا بە قەزابوونی رزگاری هەنگاوێکەی گرنگە بۆ خزمەتکردنی زیاتری رزگاری.

قوباد تاڵەبانی راشیگەیاند دانیشتووانی قەزای رزگاری کەسوکاری شەهیدانی سەربەرزی ئەنفالن و دەبێت بە باشترین شێوە خزمەت بکرێن، بڕیاریشدا بۆردێک بەناوی بۆردی بووژانەوەی رزگاری دروست بکرێت بۆ چاودێریکردنی پڕۆژەکانی خزمەتگوزاری و وەبەرهێنان لە قەزاکەدا. هەروەها بەڵێنیشی پێدان هاوکاربێت بۆ ئەوەی بە زووترین مۆنۆمێنتی شەهیدانی ئەنفال تەواو بکرێت.

PUKMEDIA