فراكسیۆنی یەكێتی بۆ هەڵەبجەییەكان: سەلماندتان بەها مرۆڤایەتییەكان لەهەموو شتێك بەرزترە

PUKMEDIA

لۆگۆی یەکێتی و ئەنجومەنی نوێنەرانی عیراق

فراكسیۆنی یەكێتی لە ئەنجومەنی نوێنەرانی عیراق، پەیام و پێزانین ئاراستەی پارێزگار، هێزەكانی ناوخۆ، تیمەكانی فریاكەوتن و خەڵكی هەڵەبجە و خورماڵ  دەكات لەپای ماندووبوونیان لە گەڕان و دۆزینەوەی تەرمی روقیەی 11 ساڵان، هاوكات سەرەخۆشی لە خانەوادەی خوالێخۆشبو و تەواوی خەڵكی پارێزگای كەربەلا دەكات.

دەقی پەیامەكە:

فراكسیۆنی یەكێتیی نیشتمانیی كوردستان
بەناوی خوای گەورە و میهرەبان 
. بەڕێز پارێزگاری هەڵەبجە 
. بەڕێز هێزەكانی ناوخۆ و تیمەكانی بەرگری شارستانی و تیمەكانی تەندروستی 
. خەڵكی بەشەرەف و سەربەرزی پارێزگای هەڵەبجە

ئێمە وەك فراكسیۆنی یەكێتیی نیشتمانیی كوردستان، لە ئەنجومەنی نوێنەرانی عیراق سوپاس و پێزانی خۆمان ئاڕاستەی ئێوەی بەڕێز دەكەین، لەپای هەوڵ و ماندوبوونتان بۆ ماوەی هەشت رۆژ لەگەڕان و پشكنین بەدوای تەرمی ڕوقەیەی 11 ساڵان، كە بەمەبەستی گەشتوگوزار لە پارێزگای كەربەلاوە خۆی خێزانەكەی سەردانی ناوچەی هەورامان یان كرد و مخابن بەهۆی نقومبووی لە ئاوی تاڤگەی زەڵم گیانی خۆی سپارد و دواتر دۆزینەوەی تەرمەكەی و رادەستكردنی بە كەسوكاری و بەرێكردنی تەرمەكە بەشێوەیەكی رەسمی بۆ زێدی خۆی . 

ئەم هەڵوێستەی ئێوە گوزارشت لەرەوشت بەرزی و مرۆڤدۆستی ئێوە دەكات و سەلماندتان كە بەها مرۆڤایەتییەكان لە هەموو بەهایەكی تر بەرز وبەنرخترە، ئەم هەڵوێستەی خەڵكی هەڵەبجە، خورماڵ و تەواوی سنوورەكە بە ئەركێكی مرۆیی و نیشتمانیی بەرز دەنرخێنین . 

هەر  بەم بۆنە خەمناكەوە، پرسە و سەرەخۆشیی خۆمان ئاراستەی خانەوادەی خوالێخۆشبوو و تەواوی خەڵكی پارێزگای كەربەلای پیرۆز دەكەین و هاوبەشی خەمیانین، خودای گەورە ڕوقەیە بە هەشتی خۆی شادبكات . 

فراكسیۆنی یەكێتیی نیشتمانیی كوردستان 

PUKMEDIA