پەیامی قوباد تاڵەبانى لە 51 هەمین ساڵیادی دامەزراندنی یەكێتیدا

نوسینگەى راگەیاندنى قوباد تاڵەبانى

قوباد تاڵەبانى

قوباد تاڵەبانى بەبۆنەى یادى 51 ساڵەى دامەزراندنى یەکێتیى نیشتمانیى کوردستانەوە پەیامێکى بڵاوکردەوە و رایگەیاند: ساڵی 1975 دوای ئەو تاڵاوی شکست و تەمی بێ هیواییەی باڵی بەسەر کوردستاندا کێشابوو، یەکێتیی نیشتمانیی کوردستان چەندە پێویست بوو بۆ گەڕاندنەوەی ورە و هیوا و بۆ رێکخستنەوەی خەڵک و جۆشدانەوەی خەباتی مافخوازانە و رزگاریخوازانەی خەڵکی کوردستان، ئێستاش دوای 51 ساڵ، بە هەمان ئەندازە یەکێتی پێویستە بۆ پاراستنی دەستکەوتەکان و چارەسەرکردنی کێشەکان و دابینکردنی مافە دەستوورییەکانی خەڵکی کوردستان.

دەقى پەیامەکە:

ساڵی 1975 دوای ئەو تاڵاوی شکست و تەمی بێ هیواییەی باڵی بەسەر کوردستاندا کێشابوو، یەکێتیی نیشتمانیی کوردستان چەندە پێویست بوو بۆ گەڕاندنەوەی ورە و هیوا و بۆ رێکخستنەوەی خەڵک و جۆشدانەوەی خەباتی مافخوازانە و رزگاریخوازانەی خەڵکی کوردستان، ئێستاش دوای 51 ساڵ، بە هەمان ئەندازە یەکێتی پێویستە بۆ پاراستنی دەستکەوتەکان و چارەسەرکردنی کێشەکان و دابینکردنی مافە دەستوورییەکانی خەڵکی کوردستان.

بۆ؟

چوونکە یەکێتی لە بەغداد و لەسەر ئاستی نێودەوڵەتیشدا ئەو هێزەیە هەمووان بەڕێزەوە حیساب بۆ هەڵوێست و سیاسەتەکانی دەکەن. هاوپەیمانی بەهێزی هەیە و بە سیاسەتی ژیرانە و حەکیمانە لە قورسترین قەیرانەکاندا و سەخت ترین ساتەوەختەکاندا دەرگا بەڕووی چارەسەردا دەکاتەوە.
 
ئێستا هەمووان بوونی یەکێتی لە بەغداد وەک گەرەنتییەک بۆ پاراستنی مافەکانی کورد و چارەسەرکردنی کێشەکانی هەموو عیراق دەبینن.

بۆ ناوخۆی کوردستانیش ئاشتی و ئازادی و دیموکراسی و دادپەروەری باوەڕی نەگۆڕی یەکێتییە. ئامانجی یەکێتی لە گەڕاندنەوەی هاوسەنگی هێز بۆ چەسپاندنی دیموکراسی و دادپەروەری و باشترکردنی خزمەتگوزاری و دۆخی ژیانی هاووڵاتییانە بەبێ هیچ جۆرە جیاوازی دانانێک.

هەر لە سۆنگەی باوەڕمان بە دادپەروەری و باشترکردنی ژیانی هاووڵاتییان سیاسەتی یەکێتی لەم قۆناغەدا گرنگیدانە بە گەشەپێدانی هاوسەنگ و بووژانەوەی ئابووریی قەزا و ناحییەکان.

وەک پێشتر بەڵێنمان داوە و ئێستاش دووپاتی دەکەینەوە، خزمەتکاری خەڵکی کوردستان دەبین. بەرژەوەندی و خواستی چین و توێژەکانی خەڵکی کوردستان، بەرژەوەندی و خواست و هەڵوێستی یەکێتیی نیشتمانیی کوردستانە.

لە یادی 51 ساڵەی دامەزراندنی یەکێتیی نیشتمانیی کوردستاندا بەڕێز و شکۆوە یادی هەموو شەهیدانی یەکێتی دەکەینەوە و سڵاو دەنێرین بۆ سەرۆک مام جەلال و ئەندامانی دەستەی دامەزرێنەر و هەموو ئەو هەڤاڵ و ئازیزانەی بە خەبات و تێکۆشانی یەکێتییەوە ماندووبوون.

هەروەها پیرۆزباییەکی گەرم لە هەموو هەڤاڵان و جەماوەری دڵسۆزی و کەسوکاری سەربەرزی شەهیدانی یەکێتی دەکەین.
دڵنیاین یەکێتی بە پشتیوانی و بە خەمخۆری جەماوەرەکەی هەر دەمێنێت و هەر گەشە دەکات و هەر وەک هێزی جێی هیوا و متمانەی خەڵکی کوردستان دەمێنێتەوە.

PUKMEDIA