57ساڵ بەسەر بەپارێزگابوونى دهۆکدا تێپەڕدەبێت

تایبەت

دهۆک

پارێزگای دهۆک، کە دەکەوێتە باکووری هەرێمی کوردستانی عیراق، وەک یەکێک لە ناوەندە گرنگەکانی سەقامگیری، فرەڕەنگی و گەشەسەندوی ئابوری لە ناوچەیەکی پڕ لە ململانێدا دەردەکەوێت.

دهۆک، لە 27ی ئایاری 1969ەوە وەک پارێزگا ناسێندراوە و شارەکە لە نێوان زنجیرە چیاکانی زاوا لە باشوور، چیای کێلیا شەدا لە باکوور  گەمارۆدراوە و هاوسنوورە لەگەڵ ناوچە کوردییەکانی تورکیا و سووریا.

بەپێی خەمڵاندن و ئامارە رەسمییەکان، ژمارەی دانیشتووانی پارێزگاکە زیاتر لە 1.4 ملیۆن کەسە، دهۆک بە یەکێک لە ناوەندەکانی پێکەوەژیانی ئاشتییانە دادەنرێت، کە تێیدا پێکهاتەکانی کورد، کلدان، ئاشووری و ئەرمەن لەپاڵ پەیڕەوانی ئاینەکانی ئیسلام، مەسیحی و ئێزدی پێکەوە دەژین.

ئەم پێکەوەژیانە وایکردووە پارێزگاکە ببێتە پەناگەیەک بۆ قوربانیانی شەڕ لە ناوچەکەدا، لە دوای سەرهەڵدانی رێکخراوی دەوڵەتی ئیسلامی (داعش) لە ساڵی 2014 و هەڵگیرسانی شەڕی ناوخۆی سووریا، دهۆک باوەشی بۆ زیاتر لە نیو ملیۆن ئاوارە و پەنابەر لە نەتەوە و ئاینە جیاوازەکان کردووەتەوە، کە لە ئێستادا لە چەندین کەمپی سەرانسەری پارێزگاکەدا نیشتەجێن.

لە رووی کارگێڕییەوە، پارێزگاکە دابەشبووە بەسەر حەوت قەزای سەرەکیدا کە بریتین لە: دهۆک (ناوەند)، زاخۆ، ئاکرێ، ئامێدی، سێمێل، شێخان و بەردەڕەش. هاوشانی فراوانبوونی دانیشتووان، شارەکە گەشەکردنێکی بەرچاوی لە کەرتی خوێندنی باڵادا بەخۆەوە بینیوە و لە ئێستادا چەندین زانکۆ و ناوەندی رۆشنبیری حکومی و تایبەت لە ناوچەکەدا کاردەکەن.

بەپێی ئامارەکانی بەڕێوەبەرایەتی گەشتوگوزاری دهۆک، پارێزگاکە نزیکەی 900 شوێنی گەشتیاری و چەندین پێگەی شوێنەواری دێرینی تێدایە، ئەمەش وایکردووە ببێتە جێگەی سەرنجی گەشتیارانی ناوخۆیی و نێودەوڵەتی.

PUKMEDIA