قوباد تاڵەبانی بۆ ئەنجومەنی پارێزگای كەركوك: یەكێتی هاوكارو پشتیوانتانە

راگەیاندنی قوباد تاڵەبانی

قوباد تاڵەبانی لەگەڵ پارێزگاری نوێی كەركوك كۆبووەوە

قوباد تاڵەبانی، لێپرسراویی مەكتەبی سكرتارییەتی سەرۆك مام جەلال سەردانی كەركوكی كرد و لەگەڵ محەمەد سەمعان، پارێزگاری نوێی كەركوك و رێبوار تەها، جێگری پارێزگار كۆبووەوە.

لەكۆبوونەوەكەدا كە رۆژی پێنجشەممە 7ی 5ی 2026 بەڕێوەچوو، قوباد تاڵەبانی پیرۆزبایی دەستبەكاربوونی لەپارێزگاری نوێی كەركوك كرد و ئامادەیی یەكێتیی نیشتمانیی كوردستانی دەربڕی بۆ پشتگیریكردنی ئیدارەی نوێی كەركوك لە خزمەتكردنی دانیشتووانی شارەكە بەبێ هیچ جیاوازییەك.

لێپرسراویی مەكتەبی سكرتارییەتی سەرۆك مام جەلال ئاماژەی بەوەدا هەڵبژاردنی یەكەمین پارێزگار لەپێكهاتەی توركمان لە مێژووی پارێزگاكەدا رووداوێكی مێژوویی گرنگە و گەشبینی خۆی دەربڕی ئەم رووداوە گیانی برایەتی و پێكەوەژیان لەنێوان هەموو پێكهاتەكاندا قووڵتر بكاتەوە.

قوباد تاڵەبانی روونیشیكردەوە: یەكێتیی نیشتمانیی كوردستان شانازی بەوەوە دەكات هەر لەسەرەتاوە ئاڵاهەڵگری پێكەوەژیان بووە و دژی هەر جۆرە پەراوێزخستنێكی پێكهاتەكان بووە لە كەركوك.

وتیشی: خواستی یەكێتی هەمیشە ئەوەبووە كە دەبێت ئیدارەی كەركوك بە بەشداری هەموو پێكهاتەكان بە شێوەیەكی دادپەروەرانە بەڕێوەبچێت، پارێزگار یان هەر بەڕێوەبەرێكی دیكە سەر بە هەر پێكهاتەیەك بێت دەبێت وەك یەك خزمەتی هەموو پێكهاتەكان بكات، چوونكە هەر سیاسەتێكی دیكە جگە لەمە خزمەتی شارەكە و دانیشتووانەكەی ناكات.

  قوباد تاڵەبانی داواشیكرد: پارێزگار و جێگرەكەی و هەروەها ئەنجومەنی پارێزگا و هەموو دامەزراوەكان لەپێناو خزمەتكردنی كەركوكدا هەماهەنگییەكی تەواویان پێكەوە هەبێت و ئامادەیی یەكێتیشی دەربڕی لەمڕووەوە هاوكار و پشتیوانیان بێت.

PUKMEDIA