سلێمانی بۆ پاراستنی شوێنەوارەكانی روو لە تەكنەلۆژیای چین دەكات

کوردستان 02:35 PM - 2026-04-30

لەچوارچێوەی چالاكییەكانی "دیالۆگی جیهانیی سەرۆك شارەوانییەكان 2026" كە لەشاری شیئانی وڵاتی چین بەڕێوەچوو، وەفدێكی باڵای پارێزگای سلێمانی، سەردانی مەزارگەی ئیمپراتۆر "چین شی هوانغ"یان كرد بۆ ئاشنابوون بەنوێترین تەكنەلۆژیای جیهانی لەبواری پاراستنی شوێنەواردا.

تەكنەلۆژیا لە خزمەت مێژوودا

لەكاتی سەردانەكەدا، لێپرسراوانی مۆزەخانەی ناوبراو سیستەمێكی دیجیتاڵی پێشكەوتوویان نمایش كرد كە تێیدا ژیریی دەستكرد (AI) و فڕۆكەی بێفڕۆكەوان بەكاردەهێنرێت بۆ ناسینەوەی پارچە شوێنەوارییە وردەكان و نوێكردنەوەیان، ئەم تەكنەلۆژیایە وایكردووە هەر پارچە شوێنەوارێك خاوەنی "ناسنامەیەكی دیجیتاڵی" بێت، كە یارمەتیدەرە لەپاراستنیان لە لەناوچوون و نمایشكردنیان بە شێوەی سێ رەهەندی بۆ گەشتیاران.

سلێمانی داوای هاوكاری لە تیمە چینییەكان دەكات

لەم بارەیەوە، گۆران رەشید محەمەد، بەڕێوەبەری گشتی راگەیاندن و پەیوەندییەكانی پارێزگای سلێمانی، لە لێدوانێكی ڕۆژنامەوانیدا ڕایگەیاند: پارێزگای سلێمانی خاوەنی زیاتر لە دوو هەزار شوێنەواری مێژووییەو لە ئێستادا چەندین تیمی بیانی سەرقاڵی كنە و پشكنینن لە ناوچەكەدا.

ناوبراو وێڕای دەربڕینی سەرسامی بە پێشكەوتنە تەكنیكییەكانی چین لەم بوارەدا، ئاماژەی بەوە كرد كە ئاواتەخوازن تیمە شوێنەوارناسە پسپۆڕەكانی چین بێنە پارێزگای سلێمانی و هاوكاری تیمە ناوخۆییەكان بكەن.

وتیشی: ئێمە دەمانەوێت سوود لە ئەزموونی وڵاتی چین وەربگرین بۆ پاراستن و نوێكردنەوەی شوێنەوارەكانمان بە شێوازێكی زانستی و سەردەمیانە.

یەكگرتنی شارستانییەتە دێرینەكان

ئەم سەردانە كە لێپرسراوانی وڵاتانی تری وەك میسریشی تێدا بوو، جەختكردنەوە بوو لەسەر ئەو پەیامەی كە تەكنەلۆژیا نابێتە هەڕەشە بۆ سەر رەسەنایەتی، بەڵكو دەبێتە پردێك بۆ بەستنەوەی شارستانییەتە دێرینەكانی وەك میسۆپۆتۆمیا، نیل و چین.

شارەزایان پێیان وایە بەشداریپێكردنی تیمە چینییەكان لە كوردستان، دەبێتە وەرچەرخانێكی گرنگ لە مێژووی كنە و پشكنین لە ناوچەكەدا، بەتایبەت بەهۆی ئەو توانا بەرزەی چین لە بەكارهێنانی "داتای دیجیتاڵی" لە جیاتی "ئەزموونی كلاسیكی" لە مامەڵەكردن لەگەڵ پاراستنى شوێنەوارە مێژووییەکان.

PUKMEDIA