کۆنفرانسێکی نێودەوڵەتی سەبارەت بە بزووتنەوەی رزگاریخوازی کورد لە ئیتاڵیا بەڕێوەدەچێت

PUKMEDIA

وێنەیەکى کۆنفرانسەکە

ئەمڕۆ پێنجشەممە 26ى3ى2026، لە زانکۆی تۆرینۆی ئیتاڵیا، کۆنفرانسێکی نێودەوڵەتی سەبارەت بە پاشەڕۆژی بزووتنەوەی رزگاریخوازی کورد دەستی پێکرد، کە بۆ ماوەی دوو رۆژ بە بەشداری توێژەران و کەسایەتییە سیاسییەکان بەردەوام دەبێت.

کۆنفرانسەکە لە ژێر ناونیشانی "بزووتنەوەی رزگاریخوازی کورد لە دووڕیانێکدا: رەگ و ریشەى مێژوویی، گۆڕانکارى ئایدیۆلۆژیی و پڕۆسەکانی بنیاتنانەوە" بەڕێوەدەچێت.

هەریەکە لە تۆڕی ئیتاڵی بۆ توێژینەوەى کوردی (RISC)، دەزگای ئامارگی، زانکۆی گەرمیان و زانکۆی رۆژاڤا لە رێکخستنیدا بەشدارن و تا 27ی ئازار بەردەوام دەبێت.

لە رۆژی یەکەمی کۆنفرانسەکەدا، گفتوگۆ ئەکادیمییەکان توێژەرانی ئەوروپا و رۆژهەڵاتی ناوەڕاستیان بۆ تاوتێکردنی رێڕەوە سیاسییەکان، ناسنامە و حکومڕانی کۆکردەوە.

کۆنفرانسەکە سبەینێ هەینی بە گفتوگۆیی فرەپسپۆڕی لە دەزگای ئامارگی کۆتایی دێت، بە بەشداری کەسایەتییە سیاسییە دیارەکان، لەوانە: ئیلهام ئەحمەد لە رۆژاڤا، پەرلەمانتاری تورکیا نەورۆز ئویساڵ ئەسڵان، پەرلەمانتاری عیراق ئەکرەم ساڵح و پەرلەمانتاری ئیتاڵیا مارکۆ گریماڵدی، دانیشتنەکەش لەلایەن کەمال چۆمانی، سەرنووسەری دەزگای ئامارگی بەڕێوەدەبرێت.

PUKMEDIA