سه‌رۆكایه‌تی كۆمار: راپه‌ڕین بووه‌ ر‌زگاری هه‌رێم له ‌چنگی دیكتاتۆر

ئەرشیف

راپەڕین

سه‌رۆكایه‌تی كۆماری عیراق له‌ 35 ساڵه‌ی یادی راپه‌ڕینه‌ مه‌زنه‌كه‌ی هه‌رێمی كوردستاندا رایگه‌یه‌ندراوێك بڵاوده‌كاته‌وه ‌و ئاماژه‌ بۆ ئه‌وه ‌ده‌كات: له‌ یادی سی و پێنجه‌مین ساڵیادی راپه‌ڕ‌ینی جه‌ماوه‌ریی گه‌لی كوردستان له‌ 5ی ئاداری 1991دا، به‌شكۆوه‌ یادی قوربانییه‌ مه‌زنه‌كانی گه‌له‌ سه‌ربه‌رزه‌كه‌مان ده‌كه‌ینه‌وه‌، كه‌ خه‌باتیان كرد دژی زوڵم، سته‌م و سه‌ركوتكارییه‌كانی ر‌ژێمی دیكتاتۆری به‌رانبه‌ر به‌ ته‌واوی پێكهاته‌كانی گه‌لی عیراق، ئه‌و قوربانییانه‌ی بوونه‌ هۆی ر‌زگاركردنی شاره‌كانی هه‌رێم له ‌چنگی ده‌زگا سه‌ركوتكه‌ره‌كانی ر‌ژێم.

ئاماژه‌ بۆ ئه‌وه‌شكراوه‌: یه‌كه‌مین چه‌خماخه‌ی ر‌اپه‌ڕ‌ین له ‌شاری ر‌انیه‌ی ده‌روازه‌ی ر‌اپه‌ڕ‌ین له‌ پارێزگای سلێمانییه‌وه‌ ده‌ستیپێكرد، كه‌ بووه‌ خاڵی وه‌رچه‌رخان بۆ ر‌زگاركردنی شاره‌كانی دیكه‌ له‌ چه‌وسانه‌وه‌ و سته‌م و هه‌نگاونان به‌ره‌و دامه‌زراندنی سیستمێكی دیموكراسیی فره‌یی په‌رله‌مانی، له‌كاتێكدا ناوچه‌كه‌ به‌ بارودۆخێكی سه‌خت و دیمه‌نی جه‌نگ، وێرانكاری و زیانی مرۆییدا تێده‌په‌ڕ‌ێت، داوا له‌ لایه‌نه‌كان ده‌كه‌ین بگه‌ڕ‌ێنه‌وه‌ سه‌ر مێزی گفتوگۆ و په‌نا بۆ حیكمه‌ت و لۆژیك ببه‌ن و ر‌ێگری بكه‌ن له‌ فراوانبوونی بازنه‌ی جه‌نگ كه‌ ته‌نها ماڵوێرانی بۆ گه‌لانی ناوچه‌كه‌ ده‌هێنێت و ده‌بێته‌ هۆی تێكدانی ئاسایش و سه‌قامگیری.

هه‌ر له‌و باره‌یه‌وه‌ دووپاتی ده‌كاته‌وه‌ كه‌ عیراق نه‌بووه ‌و نابێته‌ به‌شێك له‌ ململانێكان و رێگه‌ش نادات خاكه‌كه‌ی بۆ ده‌ستدرێژیكردنه‌ سه‌ر وڵاتانی دراوسێ به‌كاربهێنرێت، به‌ڵكو هه‌وڵ ده‌دات په‌یوه‌ندییه‌ دیپلۆماسییه‌كانی بخاته‌گه‌ڕ‌ بۆ ر‌اگرتنی جه‌نگ و په‌نابردن بۆ بژارده‌ی ئاشتی و كۆتاییهێنان به‌ڕ‌شتنی خوێنی زیاتر، بۆیه‌ هیوادارین ئه‌م بۆنه‌یه‌ ببێته‌ هه‌وێنی به‌هێزكردنی یه‌كڕ‌یزیی نیشتمانی له‌ نێوان پێكهاته‌كانی گه‌له‌كه‌مان و هێزه‌ سیاسییه‌كان، و چه‌سپاندنی پایه‌كانی دیموكراسی و یه‌كسانی له‌نێوان هه‌موواندا.

PUKMEDIA