سەرۆككۆمار: عیراق رۆڵی لەدانانی بناغەی گفتوگۆی بنیاتنەری نێوان گەلاندا هەیە

نووسینگەی راگەیاندنی سەرۆكایەتی كۆمار

پێشوازی سەرۆككۆمار لەوەفدی رێكخراوی گەلانی جیهانی

د.لەتیف جەمال رەشید، سەرۆككۆماری عیراق، ئەمڕۆ سێ شەممە 9ی كانوونی یەكەم 2025 لە كۆشكی بەغداد، پێشوازی لە ئەندرێ بێلیانینۆڤ، ئەمینداری گشتی رێكخراوی گەلانی جیهانی و وەفدەكەی كرد.

لەمیانی دیدارەكەدا كۆمەڵێك دەستپێشخەری نێودەوڵەتی بۆ بەرەوپێشبردنی گفتوگۆ لەنێوان گەلان و چەسپاندنی بەهاكانی ئاشتی و هاریكاری تاوتوێ كرا، بەتایبەتی ئەگەری ئەنجامدانی كۆڕبەندی نێودەوڵەتی گەلان (لوتكەی نێودەوڵەتی گەلان) لەعیراق بەهاوكاری رێكخراوی گەلانی جیهانی و سەرۆككۆمار پێشوازی لە دەستپێشخەرییەكە كرد و روونیكردەوە: كەمیراتی شارستانی و پێگەی رۆشنبیریی عیراق دەیكاتە هاوبەشێكی گرنگ و ژینگەیەكی گونجاو بۆ میوانداریكردنی بۆنە نێودەوڵەتییەكان بە ئامانجی بنیاتنانی داهاتوویەك لەسەر بنەمای لێكتێگەیشتن و گەشەپێدان.

سەرۆككۆمار ئاماژەی بەپابەندبوون و رۆڵی عیراق كرد لە بەهێزكردنی سەقامگیری ناوچەكە لە میانی گۆڕانكارییە خێراكانی جیهانی و گرنگی دانانی بناغەكانی گفتوگۆی بنیاتنەر لە نێوان گەلاندا.

لەلای خۆیەوە بێلیانینۆڤ سوپاس و پێزانینی خۆی بۆ سەرۆككۆمار دەربڕی و هیوای خواست كە قایل بێت بەكردنەوەی لوتكەی نێودەوڵەتی گەلان و سەرۆكایەتیكردنی لیژنەی رێكخەری فەخری، كەبڕیارە مانگی نیسانی داهاتوو لە بەغداد بەڕێوەبچێت.

PUKMEDIA