قوباد تاڵەبانی: یەكێتی لەگەڵ حكومەتێكی بەهێزو كارا دایە

راگەیاندنی قوباد تاڵەبانی

كۆبوونەوەی قوباد تاڵەبانی لەگەڵ هادی عامری

بە مەبەستی گفتوگۆكردن لەسەر چۆنییەتی پێكهێنانی حكومەتی داهاتووی عیراق، وەفدی باڵای یەكێتیی نیشتمانیی كوردستان لەگەڵ بەرێز هادی عامری، ئەمینداری گشتیی بزووتنەوەی بەدر كۆبووەوە. 

لە  كۆبوونەوەكەدا كە شەوی یەكشەممە 7ی 12ی 2025 لە بەغداد بەڕێوەچوو، قوباد تاڵەبانی رایگەیاند: یەكێتی لەگەڵ حكومەتێكی بەهێزو كارا دایە كە  لە ئاست خواست و چاوەڕوانی كۆمەڵانی خەڵكی عیراقدا بێت و بتوانێت خزمەتی  هەموو نەتەوە و مەزهەب و پێكهاتەكانیی بكات بەبێ جیاوازی. 
 
قوباد تاڵەبانی سەبارەت بە كێشە هەڵپەسێرداوەكانی نێوان هەرێم و بەغداد رایگەیاند: دواخستنی هەرچی زیاتری چارەسەركردنی كێشەكان بە زیانی هەموو عێراق تەواو دەبێت و پێویستە ئەولەوییەتی یەكەمی هەردوو حكومەتی داهاتووی عێراق و هەرێم چارەسەركردنی كێشەكانی نێوانیان بێت لەسەر بنەمای دەستور، لەسەروشیانەوە دابین كردنی بودجە و مووچەی هەرێمی كوردستان كە تێكەڵ بە ململانێ سیاسییەكان نەكرێت. 

قوباد تاڵەبانی روونیشی كردەوە: كە یەكێتی پێیوایە عیراق پێویستیی بە هەنگاونانە بەرەو گەشەسەندنی ئابووری و بۆ ئەمەش دەبێت حكومەتی داهاتوو بە یەكسانی سەیری هەموو ناوچەكانی عیراق بكات و زەمینە و دەرفەتی گونجاو بۆ گەشەسەندن و وەبەرهێنان بڕەخسێنێت. 

هەر لە كۆبونەوەكەدا دەرباز كۆسرەت رەسوڵ ئەندامی مەكتەبی سیاسی یەكێتی ئاماژەی بە پێویستی بەهێزكردنی پەیوەندی نێوان هەموو هێز و لایەنەسیاسییەكان كرد بەتایبەت پەیوەندی قوڵ و لە مێژینەی نێوان یەكێتی و لایەنەكانی شیعە لە پێناو پێكهێنانی حكومەتێكی بەهێزی هاوبەشی راستەقینە كە بتوانێت خزمەت بە هەمووان بكات و عیراقیش بەرەو سەقامگیری زیاتری سیاسی و ئابوری هەنگاو بنێت.

PUKMEDIA