رێبوار تەها: بۆ یەكەمجار ژمارەیەك پڕۆژەی ستراتیجی لەكەركوك جێبەجێ دەكرێن

PUKMEDIA

رێبوار تەها پارێزگاری کەرکوک

رێبوار تەها، پارێزگای كەركوك، رایدەگەیەنێت: ژمارەیەك لە كۆمپانیا بیانییە باوەڕپێكراوەكان دەستیان كردووەتەوە بە چالاكی وەبەرهێنان لە پارێزگاكە و گرێبەستیان ئیمزا كردووە بۆ ئیشكردن لە كێڵگەكانی نەوت و غاز، دوای ئەوەی بەهۆی بارودۆخی ئەمنییەوە نزیكەی 10 ساڵە كارەكانیان راگرتبوو، ناوچەكەشیان بەجێهێشتبوو، هاوكات بۆ یەكەمجار ژمارەیەك پڕۆژەی ستراتیجی لەكەركوك جێبەجێ دەكرێن.

رێبوار تەها، پارێزگای كەركوك بە رۆژنامەی سەباحی راگەیاندووە: ئەم كۆمپانیایانە لە رابردوودا قازانجی ساڵانەیان دەگەیشتە 26 ملیار دۆلار، بۆیە دووبارە كاركردنەوەیان كەرتی وزە لە كەركوك دەبوژێنێتەوە و داهاتی پارێزگاكە بەهێز دەكات و هەلی كار بۆ هاووڵاتییان دەڕەخسێنێت و جوڵە دەخاتە بواری خزمەتگوزاری و بیناسازییەوە.

پارێزگای كەركوك ئاماژەی بەوەشكردووە: پلانەكەیان لە ئێستادا جێبەجێكردنی زنجیرەیەك پڕۆژەی ستراتیجی لە خۆدەگرێت، كە بۆ یەكەمجارە پارێزگای كەركوك بەخۆیەوە بیبینێت و یەكێك لە كۆمپانیاكان وێستگەیەكی كارەبا دروست دەكات، كە توانای بەرهەمهێنانی 400 میگاواتی هەیە بۆ پڕكردنەوەی بەشێكی گەورەی پێداویستییەكانی كەركوك لە وزە.

راشیگەیاندووە: كۆمپانیاكان ساڵانە نزیكەی یەك ملیۆن دۆلار تەرخان دەكەن بۆ پاڵپشتیكردنی لە خزمەتگوزارییەكانی كۆمەڵگە، بۆ پێشكەوتنی كەرتەكانی پەروەردە و تەندروستی و ژێرخانی ئەو ناوچانەی میوانداری پڕۆژەكانی وەبەرهێنان دەكەن.

رێبوار تەها، پارێزگای كەركوك ئەوەشی خستەڕوو: گرێبەستێك كراوە بۆ دروستكردنی پاڵاوگەیەكی وەبەرهێنان كە توانای وەبەرهێنانی 70 هەزار بەرمیلی هەیە لە رۆژێكدا بەمەبەستی دابینكردنی پێداویستییەكانی پارێزگاكە لە نەوت و بەدیهێنانی خۆبژێوی لە باوری وزەدا.

PUKMEDIA