ئه‌نجومه‌نی وه‌زیران گفتوگۆی پرسی داهاته‌نانه‌وتییه‌كان و هه‌نارده‌ی نه‌وت ده‌كات

نوسینگەى رۆژنامەوانى حکومەتى هەرێم

وێنەى کۆبونەوەیەکى پێشترى ئەنجومەنى وەزیرانى حکومەتى هەرێم

ئەمڕۆ چوارشەممە، 10ی ئەیلوولی 2025، ئەنجومەنی وەزیرانی هەرێمی کوردستان کۆبوونەوەى ئاسایى خۆى ئەنجامدەدات.

لە راگەیەنراوێکدا حکومەتى هەرێمى کوردستان رایگەیاند: "ئەمڕۆ  ئەنجومەنی وەزیران دواپێشهاتی هەردوو دۆسیەی داهاتە نانەوتییەکان و دەستپێکردنەوەی هەناردەی نەوتی هەرێم و خستنەڕووی بڕیارەکانی کۆبوونەوەی ئەم هەفتەیەی رۆژی 9ی 9ی 2025 ی ئەنجومەنی وەزیرانی عیراقی فیدڕاڵ گفتوگۆى لەسەر دەکرێت".

ئەوەشخراوەتەڕوو: " كۆنووسی هاوبەشی وەزارەت و لایەنە پەیوەندیدارەكان لە رۆژی 2ی 9ی 2025، تایبەت بە پێشنیاریان سەبارەت بە پیادەكردنی یاسای راژە و خانەنشینیی پێشمەرگە ژمارە (38)ی ساڵی 2007 دەخرێتەڕوو".

 ئاماژەبەوەشدراوە: "راسپاردەكانی وەزارەتی دارایی و ئابووری، سەبارەت بە ئاسانكاریی پێشینە و قەرزەكانی تایبەت بە (خانووبەرە، كشتوكاڵ، پیشەسازی، نیشتەجێكردن و گەشتیاری) بابەتێکی دیکەی کۆبوونەوە دەبێت".

لە راگەیەنراوەکەدا ئەوەش هاتووە: " لە چوارچێوەی پڕۆسەی یەكخستنەوەی رێكارە داراییەكانی نێوان حكومەتی هەرێم و حكومەتی فیدراڵی، چەند پێشنیار و راسپاردەیەكی وەزارەتی دارایی بۆ یەكخستنی رێكار و رێنماییەكانی باج و رێژەكانیان، لەنێوان دامەزراوەكانی باج لە هەردوو حكومەتی هەرێم و فیدراڵ دەخرێتەڕوو".

PUKMEDIA