سودانی: لێكۆڵینەوەی بەپەلە لە هێرشە درۆنییەكانی سەر هەرێم بكرێت

راگەیاندنی سەرۆكوەزیران

محەمەد شیاع سودانی

وته‌بێژی فه‌رمانده‌ی گشتیی هێزه‌ چه‌كداره‌كانی عیراق رایده‌گه‌یه‌نێت، دوو كێڵگه‌ی نه‌وت له‌هه‌رێمی كوردستان به‌ درۆن هێرشیانكراوه‌ته‌سه‌رو فه‌رمانده‌ی گشتیی هێزه‌ چه‌كدارییه‌كانی عیراق-یش لایه‌نی په‌یوه‌ندیداری راسپاردووه‌ به‌په‌له‌ لێكۆڵینه‌وه‌ له‌و رووداوانه‌ بكه‌ن و رێوشوێنی پێویست به‌رامبه‌ر ئه‌نجامده‌رانی ئه‌و هێرشانه‌ بگرنه‌به‌ر".

 سه‌باح نوعمان وته‌بێژی فه‌رمانده‌ی گشتیی هێزه‌ چه‌كداره‌كانی عیراق له‌ راگه‌یه‌ندراوێكدا كه‌ كۆپییه‌كی ده‌ست PUKMEDIA كه‌وتووه‌ رایگه‌یاندووه‌: "دوای هێرشه‌ درۆنییه‌كان بۆ سه‌ر كێڵگه‌ نه‌وتییه‌كانی هه‌رێمی كوردستان، محه‌مه‌د شیاع سودانی فه‌رمانده‌ی گشتیی هێزه‌ چه‌كداره‌كانی عیراق لایه‌نی په‌یوه‌ندیداری راسپاردووه‌ به‌په‌له‌ لێكۆڵینه‌وه‌ی وورد و هه‌مه‌لایه‌نه‌ ده‌ستپێبكه‌ن بۆ ده‌ستنیشانكردنی ئه‌و كه‌س و لایه‌نانه‌ی له‌پشت هێرشه‌كانه‌وه‌ن بۆ سه‌ر هه‌ردوو كێڵگه‌كه‌ی نه‌وتی هه‌رێمی كوردستان، هه‌روه‌ها رێوشوێنی پێویست به‌رامبه‌ر ئه‌نجامده‌رانی ئه‌و هێرشانه‌ بگرنه‌به‌ر".

ئاماژه‌ بۆ ئه‌وه‌شكراوه‌: "فه‌رمانده‌ی گشتیی هێزه‌ چه‌كداره‌كانی عیراق رایگه‌یاندووه‌، ئه‌م هێرشانه‌ بۆ سه‌ر كێڵگه‌ نه‌وتییه‌كانی هه‌رێمی كوردستان،  مه‌ترسییه‌كی راسته‌وخۆیه‌ بۆ سه‌ر به‌رژه‌وه‌ندییه‌كانی عیراق و چه‌سپاندنی سه‌قامگیری و گه‌شه‌پێدانی وڵات، هاوكات ئاماژه‌یه‌ بۆ به‌ئامانج گرتنی دامه‌زراوه‌ گرنگه‌كانی عیراق و تێكدانی بارودۆخی وڵات".

سه‌باح نوعمان راشیگه‌یاندووه‌: "فه‌رمانده‌ی گشتی هێزه‌ چه‌كداره‌كان، رێنمایی لایه‌نه‌ په‌یوه‌ندیداره‌كانی كردووه‌، رێوشوێنی توندوتۆڵ بگرنه‌به‌ر بۆ لێپرسینه‌وه‌ له‌و كه‌سانه‌ی له‌و كرده‌وانه‌ تێوه‌گلاون"، هاوكات جه‌ختیشی كردووه‌ته‌وه‌: "حكومه‌تی عیراق به‌ هه‌موو داموده‌زگاكانییه‌وه‌، رێگه‌ به‌هیچ هه‌ڕ‌ه‌شه‌یه‌ك نادات كه‌ كاریگه‌ری له‌سه‌ر به‌رژه‌وه‌ندییه‌كانی گه‌لی عیراق هه‌بێت، هه‌روه‌ها هه‌موو رێوشوێنێكی پێویست ده‌گرێته‌به‌ر بۆ به‌هێزكردنی سیسته‌می به‌رگری، به‌شێوه‌یه‌ك كه‌ رێگری له‌ دووباره‌بوونه‌وه‌ی ئه‌و كرده‌وانه‌ بگرێت و سه‌روه‌ری عیراق  بپارێزێت".

ئەمەش لە كاتێكدایە، چەند رۆژێكە بە درۆنی بۆمبڕێژكراو هێرشدەكرێتە سەر كێڵگەنەوتییەكانی هەرێمی كوردستان، لەوانەش كێڵگەی نەوتی سەرسەنگ  لە ناحیەی چەمانكێ لە سنوری پارێزگای دهۆك و كێڵگەی خورمەڵە لە پارێزگای هەولێر.

PUKMEDIA