یەكەم كاروانی هاووڵاتیانی گیرخواردووی وڵاتان گەیشتە بەسرە

راگەیاندنی فڕۆكەخانەی نێودەوڵەتی بەسرە

فڕۆكەخانەی بەسرە

دوای پێنج رۆژ ئەمڕۆ سێ شەممە 17ی6ی2025، یەكەم فڕۆكە لە فڕۆكەخانەی نێودەوڵەتی بەسرە بە 234 سەرنشینەوە نیشتەوە، كە بەهۆی جەنگی نێوان ئێران و ئیسرائیل لە وڵاتی لوبنان گیریان خواردبوو.

بەپێی ئاژانسە هەواڵییە عیراقییەكان، فڕ‌ۆكەیەكی هێڵی ئاسمانی عیراقی كەمێك لەمەوبەر لە فڕ‌ۆكەخانەی بەسرە نیشتووەتەوە، كەلە بەیروتەوە هاتووە و 234 سەرنشینی عیراقی تێدابووە، كە لەو وڵاتە گیریان خواردبوو.

لەو بارەیەشەوە ئیدارەی فڕ‌ۆكەخانەكە رایگەیاندووە: "بڕیارە لەكاتی گەڕانەوەشیدا فڕۆكەكە 257 سەرنشین لەگەڵ خۆی بباتەوە بۆ لوبنان كە ماوەیەكە بەهۆی جەنگی نێوان ئێران و ئیسرائیل-ەوە لە عیراق گیریان خواردووە".

ئەمەش لەكاتێكدایە، پێشتر دەسەڵاتی فڕۆكەوانی شارستانی عیراق ئاماژەی بۆ ئەوە كردبوو: "لەرێگەی فڕۆكەخانەی بەسرەوە هەموو ئەو گەشتیارە عیراقییانە دەگەڕێنینەوە كە لە وڵاتان گیریان خواردووە"، ئەمڕۆش یەكەم گەشتی هاووڵاتییە گیرخواردووەكان گەیشتەوە عیراق و گەشتەكانی فڕۆكەخانەكەش  بەردەوامییان دەبێت.

هاوكات لەڕ‌اگەیەنراوێكدا حكومەتی هەرێمی كوردستان شەوی رابردوو رایگەیاندبوو: "دوابەدوای هەوڵە بەردەوامەكانی حكومەتی هەرێمی كوردستان بۆ بەهاناوەچوونی هاووڵاتیان و گەڕ‌اندنەوەیان بەسەلامەتی بۆ هەرێمی كوردستان داوا لەهاووڵاتیان دەكەین، لە هەرشوێنێك گیریان خواردووە، تكایە سەردانی نزیكترین نووسینگەی نێردە دیپلۆماسییەكانی توركیا (كۆنسوڵخانە یاخود باڵیۆزخانەی توركیا) لەو وڵاتانە بكەن بۆ وەرگرتنی ڤیزای وڵاتی توركیا و گەڕ‌انەوەیان لەرێگەی وشكانییەوە بۆ هەرێمی كوردستان".

PUKMEDIA