نێروەیی: هەڵەبجە وەك پایتەختی ئاشتی هەرێم و عیراق بناسێنرێت

PUKMEDIA

لەتیف نێروەیی ئەندامی سەركردایەتی یەكێتیی نیشتمانیی كوردستان

لەتیف نێروەیی ئەندامی سەركردایەتی یەكێتیی نیشتمانیی كوردستان، لەوتارێكدا كەلەبەشی بیروڕای PUKMEDIA دا بڵاوكراوەتەوە، لەبارەی ئیمزاكردنی یاسای بە پارێزگابوونی هەڵەبجە لە كۆشكی كۆماری نووسیوێتی: "ئەو ئیمزاكردنە تەنها مەرسومێكی ئاسایی و رێكارێكی یاسایی و كارگێری نییە، بەڵكو مانایەكی قوڵ لەناو زامێكی سەختدا دەبەخشێت، چونكە هەر لەو كۆشكەدا، دیكتاتۆر و شۆڤێنییەك بڕیاری كیمیابارانكردنی هەڵەبجەی لێدا، لەهەمان ئەو شوێنەشدا یاسای بەپارێزگابوونی هەڵەبجە لەلایەن كوردێكەوە ئیمزا كرا".

راشیدەگەیەنێت: "دەرچوونی مەرسومی بەپارێزگابوونی هەڵەبجە قەرەبووی ماددی و مەعنەوی هەڵەبجەییەكان دەكاتەوە و خەڵكی شارەكە دەستكراوەتر دەبن، كە راستەوخۆ لەڕێی حكومەتی هەرێم و حكومەتی ناوەندەوە خزمەتێكی زیاتر پێشكەش بە شارەكەیان بكرێت، بەتایبەتی لەڕێی حكومەتی ناوەندییەوە، چونكە كۆمەڵێك ئەركی سیادی دەچێتە ئەستۆیان و ماف و دەستكەوتی زیاتر بۆ هەڵەبجە دەستەبەر دەبێت".

لەتیف نێروەیی دەشنووسێت: "گرنگە هەڵەبجەییەكان سوود لەم دەرفەتە مێژووییە وەربگرن و تایبەتمەندییەكانی پارێزگاكە بپارێزن و هەڵگری پەیامی پێكەوەژیان و سەقامگیری و خزمەتكردنی شارەكەیان بن، بەم رێبازە دەتوانن هەڵەبجە وەكو پایتەختی ئاشتی و ئارامی هەرێمی كوردستان و عیراق بناسێنن".

بۆ خوێندنەوەی درێژەی وتارەكە كلیك لەم لینكە بكە:
 
هەڵەبجە لە نێوان دوو بڕیاری کۆشکی کۆماریدا

PUKMEDIA