ئەنجومەنی نوێنەران کۆدەبێتەوەو بەپارێزگابوونی هەڵەبجە دەنگی لەسەر دەدرێتەوە

PUKMEDIA

مۆنۆمێنتی هەڵەبجە

بڕیارە رۆژی دووشەممەی داهاتوو 14-4-2025 دانیشتنی ئەنجومەنی نوێنەرانی عیراق بۆ دەنگدان لەسەر پێنج پرۆژە یاسا کۆببێتەوە، کە گرنگترینیان پڕۆژەیاسای بەپارێزگابوونی هەڵەبجەیە، ئەندامێکی ئەنجومەنەکەش رایدەگەیەنێت:" هیوادارین لەم دانیشتنەدا بتوانین پرۆژە یاساکە تێبپەڕێنین و دەنگ لەسەربەپاریزگابوونی هەڵەبجە بدرێت".

چرۆ حەمەشەریف ئەندامی ئەنجومەنی نوێنەرانی عیراق لەفراكسیۆنی یەكێتی بەوێبسایتی رەسمی یەكێتیی نیشتمانیی كوردستان PUKMEDIA ی راگەیاند:" دوای ئەوەی فراکسیۆنی یەکێتی لەسەر دەنگنەدان بە پرۆژە یاسای بەپارێزگابوونی هەڵەبجە بایکۆتی دانیشتنەکانی ئەنجومەنی نوێنەرانی عیراقی کرد و رایگەیاند، هەتا پرۆژە یاسای بە پارێزگابوونی هەڵەبجە تێنەپەڕێندرێت بەشداری لە هیچ کۆبوونەوەیەکی ئەنجومەنەکە ناکات، بڕیارە رۆژی دووشەممەی داهاتوو دانیشتنی ئەنجومەنی نوێنەران ئەنجام بدرێت کە لەکارنامەکەدا پرۆژەیاسای بەپارێزگابوونی هەڵەبجەشی تێدایە".

"هیوادارین لەم دانیشتنەدا بتوانین پرۆژە یاساکە تێبپەڕێنین و دەنگ لەسەربەپاریزگابوونی هەڵەبجە بدرێت، چونکە خەڵکی هەڵەبجە شایستەی ئەوەن قەرەبووی ئەو قوربانیانەیان بۆ بکرێتەوە کە داویانە"، چرۆ حەمەشەریف وایوت.

ساڵی رابردوو پرۆژەی بەپارێزگابوونی هەڵەبجە خرایە دانیشتنەکانی پەرلەمانەوەو توانرا خوێندنەوەی یەکەم و دووەمی بۆ بکرێت و لەئێستاشدا فراکسیۆنی یەکێتی هەوڵەکانی چڕکردوەتەوە بۆئەوەی خوێندنەوەی کۆتایی بۆ بکرێت و بەڕەسمی لەلایەن پەرلەمانی عیراقەوە هەڵەبجە وەک پارێزگا بناسێنرێت،بەڵام سەرەڕای ئەم هەوڵانە و پێنج جار خرانە ناو  بەرنامەی کارەوە هێشتا دەنگی پێنەدراوە، لە بەرامبەریشدا فراکسیۆنە کوردستانییەکان بایکۆتی دانیشتنەکانیان کرد، تا ئەوکاتەی پرۆژە یاسای بەپارێزگابوونی هەڵەبجە تێدەپەڕێنرێت.

PUKMEDIA