ئه‌نجومه‌نی نوێنه‌ران بۆ داواكاری مامۆستایان كۆده‌بێته‌وه‌

PUKMEDIA

ئه‌نجومه‌نی نوێنه‌رانی عیراق

ئه‌نجومه‌نی نوێنه‌رانی عیراق بۆ داواكاری مامۆستایان و كارمه‌ندانی په‌روه‌رده‌ كۆده‌بێته‌وه‌، له‌كاتێكدا ماوه‌ی چه‌ند رۆژێكه‌ خۆپیشاندانی مامۆستایان له‌به‌غداو شاره‌كانی باشووری عیراق بۆ باشكردنی ژیانیان به‌ڕێوه‌ده‌چێت.

به‌پێی راگه‌یه‌نراوێكی نوسینگه‌ی راگه‌یاندنی ئه‌نجومه‌نی نوێنه‌ران كه‌ كۆپیه‌كی ده‌ست PUKMEDIA كه‌وتووه‌ تێدا هاتووه‌: "بڕیاره‌ رۆژی پێنج شه‌ممه‌ 10-4-2025 كۆبوونه‌وه‌ی تایبه‌تی ئه‌نجومه‌نی نوێنه‌ران له‌باره‌ی پرسی داواكاری مامۆستایان و كارمه‌ندانی په‌روه‌رده‌ ئه‌نجامبدرێت و تێیدا داواكاری مامۆستایان گفتوگۆی له‌باره‌وه‌ بكرێت".

به‌پێی راگه‌یه‌نراوه‌كه‌،" كۆبوونه‌وه‌كه‌ سه‌عات 1ی پاشنیوه‌ڕۆی سبه‌ی ئه‌نجامده‌درێت و بۆ ئه‌مه‌ش داوا له‌ ئه‌ندامانی ئه‌نجومه‌نه‌كه‌ كراوه‌ كه‌ ئاماده‌ی كۆبوونه‌وه‌كه‌بن".

ئه‌مه‌ش له‌كاتێكدایه‌، ماوه‌ی چه‌ند رۆژێكه‌ مامۆستایان و كارمه‌ندانی په‌روه‌رده‌ بۆ داواكردنی زیادكردنی مووچه‌ و ده‌رماڵه‌كانیان و نوێكردنه‌وه‌ی خوێندنگه‌كان كه‌ شایسته‌ی خوێندن بێت، خۆپیشاندان له‌ به‌غداو به‌شێكی زۆری پارێزگاكانی عیراق ده‌ستیپێكردوه‌و به‌وهۆیه‌شه‌وه‌ له‌چه‌ند شارێك گرژی و ئاڵۆزی له‌نێوان مامۆستایان و هێزه‌ ئه‌منییه‌كان درووست بووه‌.

PUKMEDIA