فەرامۆشی هەڵەبجە

PUKMEDIA

ستران عەبدوڵڵا

ستران عەبدوڵڵا

تەم ئاسمانی هەڵەبجە و ئاسمانی نیشتمان و ئاسمانی دیتنیشی گرتووە. دڵ حەزینە وێرای دوورکەوتنەوەی ئازارەکە بەقەدەر ئەم سیوحەوت ساڵە. کورتە پەژارە نییە، سێینەی پەژارەیە و سەدان فەسڵ و پێچەلپێچی تیایە. دڵ خەمینە نەک هەر لە بەر قوربانییەکان ، بەڵکە لەبەر ئەوەی زیندووەکان سەکی دڵنیاییان وەرنەگرتووە. دڵ خەمینە چونکە کبریامان هەروا بریندارە ، ئەم هاوبەشە دڵرەقە داوای لێبۆردنێکی درۆزنانەشمان پێ رەوا نابینێ. فریومان نادا و نامانخەڵەتێنێ بە دوو قسەی بەنجساز،  ئەگەرچی وا باوە زۆری خەڵەتاندووین. دڵ حەزینە و  چاو بێ تینە چونکە خۆرازیبوونمان رووشاوە و پێمان ناڵێن خوا سەبوریت بدات.

ئەم برینە وازناهێنێ و دەست لەهەوکردن و هەڵدانەوە هەڵناگرێ و ئێمەش، بەراشکاوی بیڵێین، هێشتا توانای تۆڵە و تاقەتی بەرپەرچدانەوەمان کزە. هێشتا برینەکان باڵابەرزترن لە بیرکردنەوەکان. هێشتا بۆنی  کیمیاوییەکە تیژترە لە مێخەکی ئەمەل و عەمەل .

سەبری هەڵەبجەیە وهیچ شتێک سەبوریمان ناداتەوە، قەرەبوومان ناکاتەوەو دڵمان ناداتەوە. دڵدانەوە و فەرامۆشی فەرەنجیەکی کورتە و وەبەرمان ناکا و بەتانی و یەتاخێکی دڕاوو شەپرێوە قاچی ئەم ئازارە درێژەی پێ داناپۆشێ و کورتی دێنێ.

هەڵەبجە تۆ برینمانی و لەبیرمانی، تۆ  خۆشەویست و یارمانی و لە یادمانی، پبەڵام رۆژەکان ئەوەندە زبرن و شەوەکان ئەوەندە زویرن کارێکی کردووە زۆری پەژارەی دەورانی بەعسی شۆڤێنی بزرن،. .. ونن و لاپەڕە دڕاون.

تەم ئاسمانی هەڵەبجە و خەم ئاسمانی کوردستانی خوێنین کردووە. شەرم لەولاوە گیربخوات.

کەس لێبۆردن و پەردۆنی لەسەر زمان نییە و کۆمپانیاکانی چەکسازیش  پێناچێ لەبەر خاتری شارەزوور هیچ  چەکێک لە بازاڕ بکێشنەوە و هیچ سێوێک پێشخواردنی بۆ دڵدانەوە بشۆنەوە.

PUKMEDIA